Канікулы ў археалагічным лагеры

Правесці лета з карысцю вырашылі школьнікі ў Старых Дарогах. У спякотныя летнія дні яны ў лясах з лапатамі і скрабкамі.

На працягу васьмі гадоў юныя археолагі даследуюць курганы ў лясах Старадарожскага раёна. Сярод знаходак ёсць і сапраўдныя гістарычныя адкрыцці. Падрабязна Наталля Кезік.

Вывучаць гісторыю на месцы раскопак. У археалагічным лагеры дзевяцікласніца Аліна праводзіць летнія канікулы другі год запар. Кожная знаходка для яе вельмі каштоўная. Летась школьніцы ўдалося адкапаць пацеркі. Як паказала экспертыза, у зямлі яны праляжалі з дзясятак стагоддзяў.

Усе знаходкі школьнікаў абавязкова адпраўляюць на экспертызу і дадатковае даследаванне ў Інстытут гісторыі Акадэміі навук Беларусі. У старадарожскіх лясах юныя археолагі працуюць невыпадкова. Зямля тут сапраўдная скарбонка для гісторыкаў.

Археалагічны лагер у Старадарожскім раёне працуе восьмы год запар. Школьнікі ў асноўным даследуюць вось такія курганы, яны датуюцца X-XII стагоддзямі. За гэты час тут дзеці знайшлі астанкі 15 чалавек.

Побач, як правіла, знаходзілі і ўласныя рэчы - збаны, біклажкі і нават мяхі для ежы. Але самай каштоўнай знаходкай для юных археолагаў сталі пацеркі. Нітка, на якую яны былі нанізаныя, як паказала даследаванне, зроблена з шэрсці вярблюда. А гэта значыць, што гэтая зямля 10 стагоддзяў таму была цэнтрам міжнароднага гандлю.

За лета ў Старых Дарогах археалагічны лагер арганізоўваюць у дзве змены. Сюды, як правіла, прыходзяць дзеці старэйшых класаў. Калі спрыяе надвор'е, то на час працы разбіваюць палатачны лагер.

Малодшыя школьнікі на лета плануюць вакацыі ў раённым цэнтры рамёстваў. А тут на выбар - заняткі музыкай, танцамі, майстар-класы па пляценні, ткацтве і вышыўцы.

У такіх лагерах дзённага знаходжання за летнія месяцы адпачнуць больш за 30 тысяч школьнікаў Мінскай вобласці. Яны могуць тут падцягнуць замежную мову і захапіцца фізікай, матэматыкай альбо хіміяй.