Капыль рыхтуецца да Дня беларускага пісьменства

Прыемнымі клопатамі сёння жыве Капыль, бо горад прыме Дзень беларускага пісьменства. Свята пройдзе 5 верасня. Хутка ў райцэнтр з'едуцца сотні гасцей з усіх куткоў Беларусі, а таксама замежжа. Для іх ствараюць не толькі камфортныя ўмовы інфраструктуры, але і насычаную культурную праграму. Сярод абавязковых пунктаў: экскурсіі для азнаямлення з гісторыка-культурнымі каштоўнасцямі і духоўнай спадчынай края.

Самае цікавае, што можна паказаць сёння і што яшчэ рыхтуецца да свята ў Капылі, - у рэпартажы Наталлі Бардзілоўскай.

Па самой назве горада можна чытаць старажытную гісторыю мястэчка. Яно ўзнікла ў 1106 годзе на месцы курганоў. Таму ў корані слова "Капыль" - "копанкі", "капаць", "копішча". Зрэшты, незвычайны ландшафт мястэчка захаваўся па-сённяшні дзень - ён увесь ва ўзвышшах і ўзгорках.

Гэтую прыродную асаблівасць горада ўлічылі арганізатары свята беларускага пісьменства. Высакагор'е па-мастацку абыграюць на цырымоніі адкрыцця форуму. Яго тэматычная назва "Спевы дуброў". У мастацкай канцэпцыі - імправізацыя на каштоўнасцях капыльскіх краявідаў з дубовымі гаямі і паданнямі капыльскай даўніны. Творы класікаў нацыянальнай літаратуры ў міксе з рэгіянальнай аўтэнтыкай пададуць у найноўшых тэхналагічных рашэннях.

Галоўныя цырымоніі - адкрыцця і закрыцця - будзе прымаць цэнтральная плошча Капыля. Яшчэ з дзясятак лакацый размесціцца па перыметры райцэнтра. На самым уездзе ў Капыль гасцей будзе вітаць горад майстроў і святочны кірмаш. У арганізатараў шмат задумак па пераўтварэнні мясцовых тэрыторый у зоны святочных інтэрактываў. Але і без асаблівых падрыхтоўчых клопатаў Капылю заўсёды ёсць што паказаць: помнік славутаму земляку - пісьменніку Цішку Гартнаму;дом, дзе гасцяваў і выступаў Янка Купала;мемарыял ахвярам і героям Вялікай Айчыннай вайны;праваслаўны храм і каталіцкі касцёл;краязнаўчы музей, які зараз на рэканструкцыі, але хутка здзівіць наведвальнікаў.

Зрэшты, сам Капыльскі музей - помнік гісторыі. У XIX стагоддзі тут знаходзіліся гарбарныя майстэрні. Ёсць яшчэ адна версія паходжання назвы горада Капыль: ад прылады для вырабу абутку - прадмета-"капыла". Што ні будынак, што ні вулачка мястэчка - то свая таямніца, ахутаная міфамі і даўніной. 41 аб'ект края ўнесены ў спіс гісторыка-культурных каштоўнасцей. Кожны тут зберагаюць, па неабходнасці аднаўляюць. З кожным гатовы пазнаёміць гасцей і ўдзельнікаў 28-га Дня беларускага пісьменства, які праз некалькі месяцаў і прыме горад.