Курсанты-авіятары праходзяць лётную практыку на базе Віцебскага аэраклуб

Гэтыя маладыя хлопцы аддаюць перавагу адточваць сваё майстэрства ў небе. На базе Віцебскага аэраклуба лётную практыку праходзяць курсанты авіяцыйнага факультэта Ваеннай акадэміі Беларусі. Кожны будны дзень у неба паднімаюцца тры вінтакрылыя машыны Мі-2. Курсанты адпрацоўваюць фігуры пілатажу і прывыкаюць да неба.

З вышыні палёту - рэпартаж Вольгі Маслоўскай.

Мі-2 - самы вядомы шматмэтавы лёгкі верталёт. Ужываецца для выканання грамадзянскіх і ваенных задач. Але сёння ён трэнажор, парта, за якой асновы складанай прафесіі спасцігаюць будучыя пілоты.

Больш як 20 гадоў Віцебскі аэраклуб з'яўляецца базай падрыхтоўкі курсантаў авіяцыйнага факультэта Ваеннай акадэміі. На лета сюды прыязджаюць тыя, хто выбраў спецыяльнасць "лётчык верталёта".

Каманда мары - няйначай завуць сваіх выхаванцаў інструктары Віцебскага аэраклуба. І ручку кіравання верталётам давяраюць з першых заняткаў. У другакурснікаў за плячыма 30 гадзін налёту на планеры. Гэтым летам яны толькі спрабуюць прыручыць вінтакрылую машыну. На гэта адведзена 60 гадзін. У чацвёртага курса задача больш складаная.

Палёты ўсляпую

Перад пад'ёмам у неба - агульны збор. Перадпалётныя ўказанні, метэазводка, індывідуальныя навучанні ад інструктара. У Мікіты Зяленскага сёння ў праграме падрыхтоўкі палёт усляпую. На зададзенай вышыні інструктар закрывае агляд брызентавай запавесай. Навігацыя - выключна па прыборах. І так паўгадзіны.

З кожным пад'ёмам у паветра ўпэўненасці ў дзеяннях усё больш. Вячаслаў Галузаў з Магілёва марыў аб грамадзянскай авіяцыі, але жыццё распарадзілася інакш. За два гады вучобы пра зігзаг лёсу не пашкадаваў.

Курсант вельмі старанны, распавядае яго інструктар. Святлана Манько - жанчына-легенда беларускай авіяцыі. Курсанты завуць яе "авіямамай". Выпускніца Валчанскага авіяцыйнага вучылішча ў кабіну верталёта ўпершыню села амаль 40 гадоў таму, а марыць аб небе пачала яшчэ ў дзяцінстве.

За гады працы Святлана Манько падрыхтавала некалькі дзясяткаў лётчыкаў. У гэтага набору самае цікавае яшчэ наперадзе: у жніўні будуць паднімаць машыны ў начное неба. Гэтым летам Віцебскі аэраклуб прыме яшчэ адну групу курсантаў Ваеннай акадэміі - ужо факультэта разведкі. Будуць вучыцца дэсантаванню з дапамогай парашута.