Легендарнаму харэаграфічнаму калектыву "Харошкі " - 50!

Танцам яны напісалі гісторыю Беларусі, распавялі яе на ўсіх кантынентах. Насуперак збітым канонам пачалі новую эру народнага танца. Легендзе нацыі - Акадэмічнаму ансамблю "Харошкі" - 50 гадоў.

Яны зараджаліся ў Магілёве яшчэ пад назвай "Вяснянка". Самадзейны гурток пры мясцовым аўтазаводзе імя Кірава. Народжаная ў Расіі Валянціна Гаявая пранікнулася беларускім фальклорам, пераказала яго міні-спектаклямі і была запрошана балетмайстрам у Белдзяржфілармонію. Так у студзені 74-га з'явіліся "Харошкі". Разулі стэрэатып, што беларусы - толькі ў лапцях і вывелі з-за куліс асоб у мяхах і шоўках, дазволіўшы сабе гістарычную рэканструкцыю. Першымі сталі адраджаць спрадвечна беларускую гісторыю пад жывое выкананне ўласнага аркестра. Паводле лакальных падзей - аўтарская харэаграфія і 7 тысяч камплектаў касцюмаў, створаных уручную. У 80-я і 90-я - гастролі ад Уладзівастока да Амерыкі! Культурныя дыпламаты, яны ўлюблялі ў Беларусь і французаў мінулай вясной.

Юбілейны канцэрт калектыву Гаявой пройдзе 26 студзеня ў канцэртнай зале "Мінск". А сёння Агенцтва тэленавін павіншуе легенду ў "Галоўным эфіры". Карэспандэнты АТН аблічбавалі магілёўскія архівы, прайшліся па першых падмостках з галоўнай "харошкай" ансамбля Фёдарам Балабайкам, адправіліся на гастролі ў райцэнтр і пачулі спадзевы Валянціны Гаявой. Іх "народная" біяграфія - сёння ў 9 вечара.