Лінгвістычныя лагеры працуюць у Мінскай вобласці

Канікулы - з акцэнтам! Культуру гарачай Іспаніі, вытанчанай Францыі і кансерватыўнай Германіі вывучаюць старшакласнікі цэнтральнага рэгіёна падчас заняткаў у профільных лінгвістычных лагерах. Там жа даведваюцца і пра асновы замежных моў, а яшчэ знаходзяць сяброў на адлегласці тысяч кіламетраў. Іспанскую і французскую на канікулах выкладаюць у Барысаве і Салігорску, нямецкую і англійскую ў Слуцку і Маладзечне. Агульную мову з замежнай паспрабавала знайсці і Таццяна Бажко.

Маладзечанская дзявятая школа - адзіная ў горадзе, дзе ужо паўвека выкладаюць экзатычную іспанскую мову. Адрозніваць buenas días ад buenas tardes тут вучацца з трэцяга па адзінаццаты клас. А калі навучальны год скончыўся, можна пазаймацца і на канікулах.

Абавязковы рытуал: перад пачаткам заняткаў павітацца і "настроіцца" на правільнае вымаўленне. Вучыцца ў вольны час прыйшлі самыя мэтанакіраваныя. Для іх у кожнага настаўніка ёсць свой (аўтарскі) падыход да ўрокаў.

Між іншым, вывучыць іспанскую мову беларускім школьнікам значна лягчэй. Шмат слоў падобныя не толькі значэннем, але і гучаннем! Напрыклад, іспанскае cebolla перакладаецца і нават гучыць аднолькава - цыбуля. А яшчэ палац, боты, мэта. Шмат сакрэтаў ведае і дзевяцікласніца Ксенія Голуб.

Вучань 5-й жодзінскай школы Уладзіслаў Падзерачоў на канікулах шліфуе вымаўленне на нямецкай мове. Таксама знаходзіць шмат агульных слоў - дах, гандаль, рахунак, цэгла. Заняткі праходзяць на базе абласнога лагера "Смарткамп" у Маладзечанскай санаторнай школе.

Побач вучаць англійскую. На сувязі - настаўнік з Амерыкі. Заняткі, якія ідуць дыстанцыйна, даюць каштоўны вопыт размовы з носьбітам мовы.

На пачатак ліпеня запланаваны старт яшчэ аднаго лагера - ва Уздзенскім раёне. У падарожжа вакол свету за адну змену адправяцца школьнікі з усёй вобласці.