Лепшым аратым краіны стаў Віталь Дарошка

На "Белагра" сёння вызначылі лепшага аратага. Прафесійны конкурс апрацоўшчыкаў глебы аб’яднаў 18 каманд – механізатараў экстра-класа з усіх абласцей і навучэнцаў каледжаў і ўніверсітэтаў аграрнага профілю.

Па якіх жа крытэрыях вызначаюць майстэрства, чаму механізатар у першую чаргу адказвае за ўраджайны каравай на нашым стале - ведае Аляксандр Харавец.

Слупы пылу, гул магутных рухавікоў, бляск плугоў і беларусы на энерганасычаных "Беларусах".

Правесці тэст-драйв глебаапрацоўчай тэхнікі і паказаць майстар-клас па ўзворванні зямлі ва Уздзенскі раён сёння з'ехаліся 19 каманд з усёй краіны. Гэта лепшыя механізатары Беларусі.

Віталь Дарошка за рулём трактара 12 гадоў. Апошнія 7 спецыялізуецца на ўзворванні глебы. У конкурсе ўдзельнічае ўпершыню. Прызнаецца, канкурэнцыя даволі сур'ёзная. Найперш хоча пераняць вопыт у калег.

Калі вопытныя механізатары віртуозна ўпраўляюцца з энерганасычанымі трактарамі, то юныя спаборнічаюць на класічных мадэлях.

Дзмітрый Баўкуновіч права кіраваць трактарам атрымаў літаральна два тыдні таму. Аднак узворваннем глебы займаецца апошнія 10 гадоў. Студэнт агратэхнічнага ўніверсітэта прызнаецца, у яго сям'і тры трактары, першыя ўрокі даваў яшчэ бацька. Сёння вынікам задаволены. Аднак без невялікіх хібаў не абышлося – падвяло хваляванне.

Паводле слоў аграрыяў, менавіта ад якасці ўзворвання поля залежыць будучы ўраджай.

Ворнае майстэрства вымяраецца 10 паказчыкамі - глыбіня, прамалінейнасць і вышыня землянога грэбеня. Асаблівую ўвагу суддзі звяртаюць на выкананне тэхнікі бяспекі ўдзельнікамі. Максімальная адзнака за кожны элемент - 10 балаў. За памылку здымаюць па адным.

Штогод у Мінскай вобласці апрацоўваецца амаль мільён гектараў раллі. І атрыманне рэкордных ураджаяў магчыма толькі пры поўным захаванні тэхналогіі.

Дарэчы, гэтыя спаборніцтвы сталі своеасаблівай рэпетыцыяй перад паездкай беларускай каманды механізатараў на міжнародныя спаборніцтвы. Яны пройдуць у Расіі.

Сёння лепшым аратым сярод студэнтаў стаў менавіта Дзмітрый Баўкуновіч з агратэхнічнага ўніверсітэта. Сярод майстроў вытворчага навучання першую прыступку п'едэстала заняў Яўген Бякрэнь з Жыровіцкага каледжа, а званне лепшага аратага краіны заваяваў ужо знаёмы нам Віталь Дарошка. Пераможцы атрымалі не толькі каштоўныя прызы, але і бясцэнны вопыт.