Медыцынскі груз для алімпійскай зборнай Беларусі ўжо ў Пекіне

Медыцынскі груз складаецца з трох кірункаў - 243 найменні фармакалагічных прэпаратаў, 12 адзінак спецыяльнага абсталявання, парадку 80 вырабаў медпрызначэння і сродкаў індывідуальнай абароны. Агульная сума каля 400 тысяч беларускіх рублёў. Груз фарміраваўся так, каб наша дэлегацыя ў Кітаі магла працаваць аўтаномна і ў выпадку чаго не звяртацца ў алімпійскія клінікі. Па словах дырэктара РНПЦ спорту Ірыны Малёванай, гэта дазволіць мінімізаваць кантакты з іншымі дэлегацыямі. Аднак усё роўна нашы атлеты будуць перасякацца з іншымі зборнымі ў агульнай чарзе на штодзённым ПЦР-тэсціраванні. А галоўная праблема ў тым, што забор будуць рабіць не медпрацаўнікі, а звычайныя валанцёры.

Адзначым, што ўсяго парадку 19 тысяч валанцёраў будуць працаваць на Алімпійскіх гульнях. Усе добраахвотнікі ўжо жывуць у так званым бабле, гэта значыць сістэме замкнёнага цыкла. А ўсяго яны будуць знаходзіцца ў ізаляцыі ад знешняга свету больш як два месяцы.