Маладзечна сёння жыве Нацыянальным фестывалем беларускай песні і паэзіі "Маладзечна-2021"

Гэты сезон юбілейны - дваццаты! З самай раніцы ў горадзе пануе святочная атмасфера. Цэнтральнай падзеяй стаў конкурс маладых выканаўцаў беларускай эстраднай песні. Зараз праслухоўванне фіналістаў у суправаджэнні Нацыянальнага акадэмічнага канцэртнага аркестра пад кіраўніцтвам Міхаіла Фінберга падыходзіць да завяршэння. У фінальным этапе конкурсу ўдзельнічалі 20 маладых вакалістаў з усіх куткоў Беларусі. Імёны лепшых назавуць вечарам на цырымоніі ўрачыстага адкрыцця форуму ў Летнім амфітэатры. А пакуль горад ператварыўся ў кірмаш, які сабраў музычныя калектывы і народных майстроў з усёй краіны.

У рамках фестывалю праходзяць выставы і майстар-класы, канцэрты і сустрэчы з творчымі гасцямі форуму. У праграме таксама парад духавых аркестраў, удзельнікі якога спецыяльна з'ехаліся ў Маладзечна з розных гарадоў нашай краіны.