На базе Мінскага абласнога інстытута развіцця адукацыі абмеркавалі актуальныя кірункі развіцця рэгіянальнай сістэмы адукацыі

Актуальныя кірункі развіцця рэгіянальнай сістэмы адукацыі абмяркоўвалі сёння на дыялогавай пляцоўцы на базе Мінскага абласнога інстытута развіцця адукацыі. Так, з новага навучальнага года ў школах з'явяцца факультатыўныя заняткі па духоўна-маральным выхаванні для дзяцей 5-6 класаў. Будзе працаваць кіраўнік па ваенна-патрыятычным выхаванні. Галоўная задача - акцэнтаваць увагу школьнікаў на выніках дасягненняў нашай краіны за гады незалежнасці. Дарэчы, навучальны год пачнецца ў 1 110 установах адукацыі Мінскай вобласці. За парты 1 верасня сядуць 163 тысячы школьнікаў, больш за 63 тысячы дзяцей прыйдуць у дашкольныя ўстановы адукацыі цэнтральнага рэгіёна.

Падагульняць вынікі ўжо ў гэтую пятніцу ў Нясвіжы на канферэнцыі педагагічных работнікаў сталічнай вобласці. У праграме - прэзентацыя дасягненняў сістэмы адукацыі, знаёмства з IT-праектамі навучэнцаў і вопытам работы агракласаў. Таксама тут пройдзе ўшанаванне лепшых педагогаў і маладых спецыялістаў, якія толькі прыбылі на працу ў цэнтральны рэгіён.