На рахунку хлебаробаў Мінскай вобласці амаль 1 300 тысяч тон збожжавых

На рахунку хлебаробаў Мінскай вобласці ўжо амаль 1 300 тысяч тон. Збожжавыя ўбраны на 75 %. З гектара ў сярэднім атрымліваюць 36 цэнтнераў.

Жніво са знакам якасці і духам спаборніцтва! Сёння ў Нясвіжскім раёне ўшаноўвалі вадзіцеляў, якія за ўборачную перавезлі з палёў больш за 3 тысячы тон збожжа. Дзмітрый Кунцэвіч, Леанід Вялічка і Віктар Пячкоўскі працуюць у агракамбінаце "Сноў". Павіншаваць хлебаробаў легендарнай гаспадаркі прыехаў першы сакратар БРСМ Аляксандр Лук'янаў, для якога, дарэчы, гэта першы працоўны дзень на новай пасадзе. Акцыя "Моладзь за ўраджай!" ахапіла ўсе рэгіёны краіны. Сноўскія ж аграрыі атрымалі памятныя ўзнагароды і падарункі за няпростую працу. А перавозіць з палёў ёсць што: ураджайнасць збожжавых у агракамбінаце адна з лепшых у краіне.

Добрая ўраджайнасць збожжавых (таксама больш за 80 цэнтнераў з гектара) і ў сельгасфіліяле "Клецкі' Слуцкага сыраробнага камбіната. Узнагароды сёння тут атрымаў маладзёжны экіпаж - Аляксандр Салодкі і Аляксандр Галавач - разам намалацілі больш за 2 500 тон збожжа. У гэтым дапамог і новы камбайн "Гомсельмаш".

Усяго ў гэтым сезоне на ўборачнай задзейнічаны 778 маладзёжных экіпажаў (з іх 5 двухтысячнікі) і 540 маладых вадзіцеляў. Праект "Моладзь за ўраджай!" праходзіць ужо тры гады.