Народная артыстка Беларусі Марыя Захарэвіч адзначае юбілей

Актрыса, якую пазнаюць па голасе. Менавіта за радыёпастаноўкі яна ўдастоеная Дзяржаўнай прэміі Беларусі. Народнай артыстцы Марыі Захарэвіч сёння споўнілася 85 гадоў, больш як 60 з якіх яна прысвяціла служэнню Купалаўскаму тэатру! З юбілеем народную артыстку павіншаваў Прэзідэнт. У асабістым рэпертуары Захарэвіч дзясяткі тэатральных прац, у яе выкананні ажылі і сталі эталоннымі гераіні нацыянальных аўтараў, а таксама характарныя персанажы сусветнай літаратуры. Актрысе заўсёды паспяхова даваліся як драматычныя ролі, так і камедыйныя. Марыя Захарэвіч сярод тых купалаўцаў, якія склалі гонар услаўленага калектыву і нават пасля няпростага перыяду ў Купалаўскім народная артыстка працягвае выходзіць на сцэну! З 60-ых яна гучыць у кожным доме. Яе чытанне твораў беларускіх класікаў уваходзіць у залаты фонд Беларускага радыё. У архівах захоўваюцца звыш 2 сотняў запісаў з удзелам Марыі Захарэвіч. Дарэчы, вядомы дыктар стаіць ля вытокаў нацыянальнага тэлебачання. Сюды яна трапіла на трэцім курсе тэатральна інстытута, хоць яна і зусім не збіралася быць актрысай, а марыла стаць выкладчыкам беларускай мовы і літаратуры.