Сапраўдны бум першакласнікаў сёлета назіраецца ў школах Гродна

Навучальныя ўстановы набіраюць літаральна па 16 класаў. Такі паток юных беларусаў не можа не радаваць, відавочны рост нараджальнасці. Праўда, з такімі тэмпамі і алфавіту можа не хапіць. Але пакуль прыйдзецца прывыкаць да першага "Р".

Школьнікі займаюцца ў тры змены. Ці адаб'ецца гэта на якасці адукацыі, высвятляў Юрый Карняловіч.

Настаўнік пачатковых класаў Эла Бярней у 39-й школе працуе ўсяго некалькі гадоў. Прызнаецца, уладкоўвалася на працу з асцярогай. Навучальная ўстанова ў маладым мікрараёне перапоўнена дзецьмі - у класах па 25-30 чалавек. Каб не абдзяліць увагай нікога, прыйшлося асвойваць новыя методыкі навучання і выкарыстоўваць сучасныя тэхналогіі.

Мікрараён Альшанка - самы буйны ў Гродне. Тут шмат маладых і шматдзетных сем'яў, а вось школа адна. Таму сітуацыя, калі першых класаў больш за дзясятак, ужо нікога не здзіўляе. Але сёлета рэкорд пабіты - дзяцей размеркавалі ў 16 класаў. Бацькоў такая перагружанасць, вядома, палохае, але дзявацца няма куды. Да найбліжэйшай школы некалькі кіламетраў на грамадскім транспарце.

Каб размясціць усіх ахвотнікаў і правільна арганізаваць навучальны працэс, у школе перайшлі на трохзменнае навучанне. А каб максімальна заняць дзяцей, адкрылі шматлікія кружкі і спартыўныя секцыі.

На пераменах за першакласнікамі заўсёды прыглядаюць дзяжурныя настаўнікі. Але ў школе спадзяюцца, што ў наступным годзе колькасць пачатковых класаў значна скароціцца.

Рашэннем праблемы стане будаўніцтва ў новым мікрараёне самай вялікай у вобласці школы на 2 500 месцаў. Плануецца, што свае дзверы яна расчыніць 1 верасня 2019 года. Гэта будзе навучальна-спартыўны комплекс са шматлікімі заламі для трэніровак і басейнам.

У суседнім мікрараёне Вішнявец у 40-й школе першых класаў менш - 10. Але чатырох і трох - пятнаццаць. Праўда, тут новыя дамы ўжо не будуюць, таму і сітуацыя змяняецца. Паступова.

Каб прадухіліць падобныя праблемы ў будучыні, гарадскім уладам прыйдзецца змяняць планы пры будаўніцтве новых мікрараёнаў. Разам з узвядзеннем жылля больш увагі надаваць развіццю сацыяльнай інфраструктуры.