Арганізацыя руху на час Радаўніцы будзе змененая

Дарожная міліцыя паведаміла, як магчыма будзе праехаць у раёне могілкаў каля Мінска. Такія меры неабходныя, каб пазбегнуць затораў і праблем на дарозе. Змяненні закранулі раён Паўночных могілкаў. На ўчастку трасы Калодзішчы - Заслаўе, прылеглай да цвінтара, арганізаваны аднабаковы рух. Паласа сустрэчнага кірунку вылучаная толькі для грамадскага транспарту. Аўтамабілісты, якія будуць ехаць з боку МКАД у вёску Цна для ўезду на могілкі, будуць накіраваныя ў аб'езд па дарогах Дубаўляны - Бараўляны - Каралёў Стан і Мінск - Калачы - Мядзел. Такім чынам, пад'езд да Паўночных могілкаў арганізаваны ў аднабаковым рэжыме. Прыпаркаваць машыну можна будзе на правай абочыне дарогі Калодзішчы - Заслаўе.

Да Міханавіцкіх могілак пад'езд з боку Мінска на індывідуальным транспарце будзе здзяйсняцца праз пасёлак Міханавічы, а вось выезд з могілкаў ужо па іншым маршруце - па дарозе Асееўка - Міханавічы і Смалявічы - Самахвалавічы - Негарэлае. Аўтамабілі можна будзе прыпаркаваць на абочынах праездаў і на тэрыторыі саміх могілак. У выпадку вялікай колькасці аўтобусаў на пляцоўцы ўезд і выезд асабістага транспарту будзе здзяйсняцца праз запасныя вароты.

У сувязі з рамонтам моста паблізу ад вёскі Азярцо пад'езд да Заходніх могілкаў абмежаваны. Дабрацца да яго можна па трасах Мінск - Гродна, а таксама Заслаўе - Дзяржынск - Возера праз вёску Старое сяло. Выезд арганізаваны па дарозе МКАД - Гарадзішча - Старое сяло.

ДАІ просіць з увагай паставіцца да гэтага і па магчымасці пазбегнуць паездак на асабістым аўтатранспарце.