Прадстаўнікі залатога ўзросту Мінскай вобласці сустрэліся ў Любані

Любань сёння стала пляцоўкай для актыўных жыхароў Мінскай вобласці - прадстаўнікоў залатога ўзросту. Удзельнікі форуму падзяліліся сваімі праектамі, а яшчэ абмеркавалі перспектывы развіцця нацыянальнай стратэгіі "Актыўнае даўгалецце". Злёт пажылых грамадзян кожны раз уражвае сваёй душэўнасцю. 

"Узрост мудрасці, цяпла і дабрыні..." Прадстаўнікі старэйшага пакалення - самыя ініцыятыўныя і актыўныя - з розных куткоў цэнтральнага рэгіёна сабраліся сёння тут, у Любані. Праграма абласнога злёту насычаная: творчыя майстар-класы, у тым ліку па традыцыйных народных танцах, тэматычныя выставы, трэніроўкі па дыхальнай гімнастыцы.

І сёння ж прадстаўнікі залатога ўзросту атрымалі ўзнагароды за актыўную грамадскую дзейнасць, за захаванне сямейных традыцый і каштоўнасцей, за дасягненні ў творчасці. Адзначылі таксама ўладальнікаў лепшых падворкаў. Узнагароды атрымалі і ветэраны працы.

У Мінскай вобласці людзі паважнага ўзросту актыўна далучаюцца да розных ініцыятыў і праектаў. У кожным раёне створаны савет пажылых грамадзян - усяго гэта больш за 200 чалавек. Іх жыццёвы вопыт і мудрасць - вартыя павагі і пераймання.