Роўна тыдзень застаецца да V Форуму рэгіёнаў Беларусі і Расіі

На тры дні Магілёў ператворыцца ў саюзную пляцоўку, дзе можна будзе, што завецца, і сябе паказаць, і на іншых паглядзець. Свой удзел ужо пацвердзілі 20 губернатараў Расіі. Мяркуецца, што будзе падпісана больш як 70 дакументаў аб супрацоўніцтве. Абмяркуюць пытанні, звязаныя з забеспячэннем роўных правоў грамадзян дзвюх краін, а таксама роўных умоў гаспадарання для юрыдычных асоб. Абавязковая частка форуму - гэта новыя экспартныя кантракты. Хто змацуе іх подпісамі, і чаму ў Брыльянтавай зале загса? Падрабязнасці падрыхтоўкі маштабнага форуму даведаемся ў Анастасіі Бенедзісюк.

Да брыльянтавага вяселля (а гэта 60 гадоў) Саюзу Беларусі і Расіі ў кантэксце Форуму рэгіёнаў, вядома, яшчэ далёка. Пакуль рыхтуемся да куды меншай даты - 5 гадоў. Зрэшты, з вясельнай тэматыкі пачынаем нездарма.

Менавіта ў Магілёўскім загсе пройдзе Савет дзелавога супрацоўніцтва. Такі фармат выбраны ўпершыню. Тут, у Брыльянтавай зале, не толькі абмяркуюць бізнес-асяроддзе Беларусі і Расіі, але і змацуюць подпісамі канкрэтны саюз. Так, напрыклад, Магілёўхімвалакно падпіша адразу тры кантракты на 100 мільёнаў долараў.

"Пяты форум рэгіёнаў Беларусі і Расіі будзе лепшым у гісторыі", - працягне парламентарый Уладзімір Панцюхоў. Сёння адказ перад журналістамі трымалі адразу пяць прадстаўнікоў пастаянных камісій Савета Рэспублікі. Кожны з іх - мадэратар асобнай секцыі форуму. Розная тэматыка (ад міжнароднай і эканамічнай бяспекі да ўніфікацыі заканадаўства ў рамках Саюзнай дзяржавы) і ўсюды адбор дакладчыкаў на конкурснай аснове. Такой колькасці ахвочых выступіць на саюзнай сустрэчы яшчэ не было. Свой удзел ужо пацвердзілі 20 губернатараў Расіі. Усяго ж у Магілёве чакаюць дзве тысячы гасцей.

Сёння і перад Беларуссю, і перад Расіяй стаіць адна задача - падвоіць ВУП да 2025 года. Найбліжэйшая сямігодка стане асноватворнай для вырашэння эканамічных пытанняў дзвюх дзяржаў. Форум - выдатная пляцоўка злучыць інавацыйны і інвестыцыйны патэнцыялы рэгіёнаў. Эканамічны эфект не прымусіць сябе чакаць.

Агульная сума кантрактаў і пагадненняў экспартных можа дасягнуць практычна паўмільярда долараў. І гэта ў два разы больш, чым у суме за папярэднія чатыры форумы.

Важнай падзеяй стане пасяджэнне Міжпарламенцкай камісіі Савета Рэспублікі і Савета Федэрацыі - менавіта пад іх эгідай і праходзіць форум. Прыярытэтнай застанецца і моладзевая тэма. Так яшчэ напярэдадні, 9 кастрычніка, у Магілёве сустрэнуцца юныя актывісты Беларусі і Расіі. Пазней для іх пройдзе спартакіяда, турнір па хакеі з шайбай, а таксама "Адкрыты дыялог".

Не толькі саюзнае, але і гарадское будаўніцтва - маштабнае - прадвесціла падрыхтоўку да форуму. Магілёў вельмі змяніўся. Абноўленай прыме гасцей плошча Славы, Палац культуры. І яшчэ на ўездзе - знакавы аб'ект. Яго завуць магілёўскай трыумфальнай аркай - 20 метраў у вышыню, 1400 тон бетону, 777 тысяч рублёў. Прысвечаная героям горада на Дняпры, а гэта - і працаўнікі, і ветэраны. Зараз заканчваюць лесвіцу. Акрамя гэтага, на фінішы рэканструкцыя дарогі.

Што датычыцца руху транспарту, абмежаванні закрануць толькі вуліцы Першамайскую, Касманаўтаў, праспекты Міру і Пушкінскі. Іх перакрыюць на кароткі прамежак часу для праезду картэжаў і калон удзельнікаў Форуму рэгіёнаў.

Грамадскі транспарт будзе ездзіць без змяненняў. У абласной ДАІ папярэдзілі: на тры дні будуць закрытыя паркоўкі каля ўніверсітэтаў ім. А. Куляшова і харчавання. А вось самога харчавання будзе на любы густ. Адкрыюцца дадатковыя гандлёвыя пляцоўкі, запрацуе горад майстроў. Рэгіянальныя пляцоўкі забяспечаць.