Самыя маляўнічыя моманты Нацыянальнага фестывалю беларускай песні і паэзіі "Маладзечна-2021"

Адзін з культурных брэндаў нашай краіны - нацыянальны фестываль беларускай песні і паэзіі - стартаваў напярэдадні ў Маладзечне. Юбілейны, XX музычны форум здзіўляе гледача канцэртамі, выставамі, пастаноўкамі. Праходзіць у горадзе і кірмаш народных рамёстваў, творчыя майстар-класы. Але ў цэнтры ўвагі ўсё ж музыка і конкурс маладых выканаўцаў беларускай эстраднай песні. Ужо вядомыя імёны лаўрэатаў і ўладальнік Гран-пры.

Самыя маляўнічыя фестывальныя моманты - у рэпартажы Наталлі Бардзілоўскай.

Хочаце пачуць роднае слова, мелодыку матчынай мовы, матывы класікаў ці радкі сучасных аўтараў? Прыязджайце ў Маладзечна! Тут з 1993 года і па сённяшні дзень вось ужо дваццаты раз ладзіцца буйны форум нацыянальнага маштабу, што яднае пакаленні беларусаў, якія шануюць родную культуру, бацькоўскую спадчыну, сваю краіну.

Вось так кожны раз, а ў Год народнага адзінства асабліва сімвалічна: далі старт святу талакой. "Талаку" - аднайменную праграму - на цырымоніі адкрыцця прапанаваў і галоўны зачынальнік маладзечанскага форуму – Нацыянальны канцэртны аркестр, Міхаіл Фінберг і яго вакалісты. Нумар за нумарам, песня за песняй – гучала слова Уладзіміра Караткевіча на мелодыку Ігара Паліводы.

"Залатыя галасы" Нацыянальнага канцэртнага аркестра прырасталі год ад года. Конкурс да конкурсу. У творчай майстэрні Фінберга – пераможцы і лаўрэаты рэспубліканскага конкурсу маладых выканаўцаў эстраднай песні розных гадоў. Конкурс жа – нязменная частка фестывалю беларускай песні. І сёлета сабраў моладзь з усіх рэгіёнаў. Дваццаць самых галасістых юнакоў і дзяўчат прайшлі праз тры туры і вопыт працы з аркестрам Фінберга.

А гэта будучыя прэтэндэнты на ўвагу сур'ёзных прафесіяналаў - лаўрэаты і пераможцы конкурсу "Маладзічок-2021". Лепшыя ўдзельнічаюць у гала-канцэрце. Канцэртныя пляцоўкі – гэта не абавязкова падмосткі ў цэнтры. Імправізацыямі загучалі звычайныя вуліцы і падворкі народных майстроў.

Вось яно - народнае адзінства! Праз карані нашых продкаў, культурную спадчыну. Па кірмашы народных рамёстваў можна вывучаць этнакарту ўсёй Беларусі. Выставы і майстар-класы: ад бярэзінскіх лыжачнікаў, любанскіх ткачых, маладзечанскіх лозапляцельшчыкаў.

Маладзечанскі форум доўжыцца тры дні. Але менавіта яго ўрачысты старт вяртае да сябе зноў і зноў. Вячэрні горад. Шматлюдны амфітэатр. Агні сафітаў і гукі фанфар. Прывітальнае слова ад кіраўніка дзяржавы як сведчанне асаблівага месца гэтага форуму ў культурнай афішы сучаснай Беларусі. І доўгачаканая развязка інтрыгі: галоўная ўзнагарода фестывалю-2021 і спецпрыз імя Уладзіміра Мулявіна ў руках Ніколь Фургал з Віцебска.

Музычны форум у Маладзечне яшчэ не паставіў кропку. Заўтра - фестывальная нядзеля. Свята, якое дае магчымасць беларусам дэманстраваць свае таленты і дзяліцца пазітывам, працягваецца.