Сёння пасля рэканструкцыі зноў адкрыецца мінскі стадыён "Дынама"

Лічаныя гадзіны застаюцца да галоўнай спартыўнай падзеі гэтага дня. Гэтым вечарам пасля рэканструкцыі зноў адкрыецца мінскі стадыён "Дынама". Дарэчы, Міжнародная федэрацыя лёгкай атлетыкі прысвоіла арэне вышэйшую катэгорыю.

Зараз там працуе наш карэспандэнт Павел Капуцкі (прамое ўключэнне).

Гэта цудоўны стадыён "Дынама", які захаваў гістарычны каларыт, але пры гэтым сучасны і ўтульны. Апошні футбольны матч тут прайшоў пяць з паловай гадоў таму. У канцы лістапада 2012 года БАТЭ ў Лізе чэмпіёнаў прымаў французскі "Ліль". У снежні "Дынама" закрылі на рэканструкцыю.

Барысаўскі клуб даўно праводзіць еўракубкавыя матчы на сваёй арэне, а футбольная зборная за гэты час ужо прывыкла гуляць не ў Мінску. Але восенню вернецца дахаты. 22 тысячы сядзенняў гомельскай вытворчасці. Прыкладна 70 % з іх абароненыя ад дажджу. Зараз "Дынама" адпавядае патрабаванням Міжнароднай асацыяцыі лёгкаатлетычных федэрацый. Мінск будзе змагацца за чэмпіянат Еўропы або свету.

Зараз на "Дынама" ідзе апошняя падрыхтоўка да адкрыцця. У ім паўдзельнічаюць прэзідэнт Міжнароднай федэрацыі лёгкаатлетычных федэрацый Себасцьян Коэ і алімпійская чэмпіёнка Афін Юлія Несцярэнка. Пачатак цырымоніі ў 19 гадзін. Транспартнікі скароцяць інтэрвал руху аўтобусаў пад нумарамі 1, 100 і 127, а таксама 3 і 6 тралейбусаў.

Кульмінацыя свята - футбольны матч. Аб'яднаная каманда мінскага і брэсцкага "Дынама" пазмагаецца са зборнай астатніх клубаў Вышэйшай лігі чэмпіянату Беларусі, кіраваць якой будзе галоўны трэнер нацкаманды Ігар Крывушэнка. Прамая трансляцыя адсюль у 19 гадзін на тэлеканале "Беларусь 5".