Стартавала ўступная кампанія

Першае ЦТ ужо прайшло. Гэтай раніцай абітурыенты здавалі беларускую мову. Усяго каля 25 тысяч чалавек па ўсёй краіне. Вынікі будуць вядомыя праз два тыдні. Сёлета мінімальны парог павысілі. Так, да прыкладу, мову - рускую або беларускую - трэба здаць мінімум на 10 балаў, а для спецыяльнасцяў філалагічнага профілю і ўвогуле 25.

Такім чынам, уступная кампанія - 2018 - чаго чакаць? Ці адпавядаюць заданні школьнай праграме? А таксама настроі выпускнікоў і бацькоў – пра ўсё па парадку расказвае Анастасія Бенедзісюк.

Рэспубліканскі інстытут кантролю ведаў. Менавіта тут распрацоўваюць заданні да цэнтралізаванага тэсціравання. І менавіта адгэтуль напярэдадні бланкі з пытаннямі па беларускай мове і адправілі ў спецыяльных валізах па месцах правядзення ЦТ. Надзейны канал дастаўкі забяспечвае фельд’егерская служба.

Зразумела, структура гэта закрытая. Людзі ваеннаабавязаныя, пры сабе маюць зброю. Прыняць валіз можа толькі супрацоўнік, чыё прозвішча пазначана на пломбе. А далей - у сейф. Пра тое, што ЦТ выключае любыя маніпуляцыі з вынікамі, гаворыць і статыстыка. За апошнія сем гадоў - ні аднаго выпадку карупцыі.

Увесь працэс ад прыёму дакументаў, падрыхтоўкі і правядзення ўступнай кампаніі да залічэння абітурыентаў у шэрагі студэнтаў кантралююць у Камітэце дзяржкантролю. Усяго 160 чалавек.

Толькі ў Гомельскай вобласці на ЦТ па беларускай мове зарэгістраваліся сёлета амаль 4 тысячы чалавек. Адным з самых масавых месцаў здачы ў рэгіёне стаў універсітэт імя Францыска Скарыны. Усяго ж праверыць веды можна было ў 6 пунктах: чатыры - у Гомелі і па адным - у Мазыры і Светлагорску.

А гэта ўжо Мінск. Да сейфа члены камісіі падыходзяць, зверыўшы гадзіннікі.

Летась Васіль Жарко адкрываў ЦТ у Інстытуце замежных моў, а сёлета намеснік прэм'ер-міністра назіраў за правядзеннем выпрабавання ў БДУІР. Дарэчы, урач па адукацыі, адразу зверне ўвагу - у аўдыторыі няма вады. Пазней у камісіі растлумачаць, праносіць яе можна, але толькі бутыляваную і ў празрыстай упакоўцы. Але ні адзін з абітурыентаў такой магчымасцю не скарыстаўся. Да наступнага ЦТ у БДУІР паабяцалі, што вада будзе ў кожнай аўдыторыі. Гарачая пара, што і гаварыць!

А вось Таццяна Макаўчык да ЦТ ставіцца як да праверкі сябе ж... на ўдачу. Гаворыць, увесь год рыхтавалася выключна да ўнутранага іспыту. Яе мэта - таксама БДУІР. А наогул дзяўчына - без двух тыдняў дыпламаваны тэхнік-праграміст. Заканчвае Мінскі радыётэхнічны каледж.

55 тысяч студэнтаў гатовы прыняць сёлета беларускія ВНУ. Як і летась, часткова скарацілі юрыдычныя і эканамічныя спецыяльнасці. Павялічылі колькасць месцаў па тэхнічных, тэхналагічных і IT-кірунках. Кіраваліся, перш за ўсё, сітуацыяй на рынку працы. Усе тэсты адпавядаюць школьнай праграме. Над імі працавалі спецыяльна створаныя год назад рабочыя групы. У іх увайшлі вопытныя педагогі з сярэдняй школы. Па асобных прадметах паднялі парог, дазволіць здаваць адразу 4 ЦТ, можна выкарыстаць сертыфікаты мінулага года. А цяперашнія будуць актуальныя і ў 2019-м.

Ужо ў чацвер свае сілы абітурыенты правераць у веданні рускай мовы. Вынікі даведаемся праз два тыдні. А вось сертыфікаты пачнуць выдаваць з 10 ліпеня.