Скульптуры Дзмітрыя Аганава ўпрыгожваюць вуліцы беларускіх гарадоў

Майстар сілуэта ў розных матэрыялах – бронзе, дрэве, камяні. Скульптуры Дзмітрыя Аганава ўпрыгожваюць вуліцы беларускіх гарадоў. Разгадаць філасофію вобразаў і працэс стварэння скульптур у майстэрні паспрабавала Ларыса Гулякевіч.

Бронза, дрэва, камень… Яму падпарадкоўваюцца розныя матэрыялы, якія аўтар удала спалучае паміж сабой. Тэматыка ад міфалагічнай да сакральнай. Скульптурныя творы Дзмітрыя Аганава складаныя па тэме, вытанчаныя па пластыцы. Пераплятаюць між сабой жыццё, гісторыю і эпас. Канцэпцыю адразу не зразумееш, вобразы трэба вывучаць паступова.

Дзмітрый Аганаў родам з Наваполацка, з дынастыі скульптараў. Ён абраў свой творчы шлях, асабісты почырк. Скончыў Акадэмію мастацтваў, выкладае ў Беларускім дзяржаўным універсітэце на кафедры дызайну, нядаўна атрымаў ступень магістра.

Пластычная выразнасць і экспрэсія перадаюцца ў кожным сантыметры

Сярод розных мастацкіх эксперыментаў - вылучаюцца сілуэтныя работы. Пластычная выразнасць і экспрэсія перадаюцца ў кожным сантыметры. Гэта – гераіня са старажытнагрэчаскага міфа… А гэта - аўтарскі вобраз – птушка, якая пераносіць душы ў іншыя прасторы.

Усё тое, што выглядае проста і лаканічна, робіцца вельмі складана. Гэтае правіла Дзмітрый Аганаў пазычыў у мастакоў Зімбабвэ пасля наведвання выставы ў Германіі.

Многія манументальна-дэкаратыўныя кампазіцыі ўпрыгожваюць гарады Беларусі - у Наваполацку "Калыска часу" і "Анёл-захавальнік", а ў Мінску - памятны знак "З'яўленне іконы Божай Маці...". А зараз аўтар рыхтуе прэм'ерную серыю скульптур - прысвечаную венецыянскай гісторыі архітэктуры.