Злёт юных ратавальнікаў аб'яднаў больш за 300 школьнікаў Мінскай вобласці

Злёт юных ратавальнікаў на тры дні аб'яднаў больш за 300 школьнікаў з кожнага раёна Мінскай вобласці. Палявы лагер паводле традыцыі размясціўся на беразе Плешчаніцкага вадасховішча. Падчас гэтага адмысловага спартыўнага марафону дзеці на практыцы дэманструюць веды і навыкі паводзінаў пры ўзнікненні надзвычайных сітуацый: ад аказання дапамогі пацярпеламу на вадзе да пошуку чорнай скрыні пасля ўмоўнага крушэння самалёта. Маштаб вучэнняў ацаніла Наталля Кузьміцкая.

15-ы раз запар Плешчаніцкае вадасховішча сустракае ўдзельнікаў абласнога злёту юных ратавальнікаў. На старце спартыўнай часткі - больш як 20 каманд. Школьнікі і кадэты, якія вывучаюць на факультатывах асновы бяспекі, тут ад тэорыі перайшлі да практыкі. Саперніцтва, адрэналін і шматлікія эмоцыі - на кожным этапе спаборніцтваў.

Усе заданні выратавальнага марафону максімальна набліжаны да рэальных сітуацый: ад аказання дапамогі пацярпеламу на вадзе да пошуку чорнай скрыні на месцы ўмоўнага крушэння верталёта.

Кожная з каманд праходзіць 7 этапаў. Галоўнае хуткасць і правільнасць дзеянняў. Навыкі юных ратавальнікаў ацэньваюць спецыялісты, для якіх гэтыя заданні не вучэбная трывога, а штодзённая праца.

Галоўная мэта палявога лагера не змянілася - яшчэ раз адпрацаваць са школьнікамі дзеянні пры ўзнікненні надзвычайных сітуацый, асабліва падчас летніх канікул. А яшчэ гэта і добрая прафарыентацыйная пляцоўка.

Заўтра пажарныя атрады чакаюць новыя выпрабаванні. Пераможцаў жа вызначаць у пятніцу. Найлепшая каманда будзе прадстаўляць Мінскую вобласць на рэспубліканскім злёце юных ратавальнікаў у лагеры "Зубраня", які адбудзецца ў ліпені.