Складаныя ўмовы надвор’я чакаюцца ў Беларусі 30 ліпеня

5 пашкоджаных аўтамабіляў, а таксама 5 пашкоджаных жылых дамоў і школа, сотні паваленых дрэў - такія наступствы непагадзі, што разгулялася ў Беларусі 29 ліпеня. Ёсць і пацярпелыя. Так, у Карэліцкім раёне галіна траўміравала лесніка, а ў Бабруйску дрэвам, якое ўпала ад парыву ветру, траўміравана пенсіянерка. Пацярпелыя шпіталізаваныя.

Парывы ўраганнага ветру пакінулі свае наступствы і на дваровых тэрыторыях. У Мінску, напрыклад, паваліла каля 70 дрэў. Працягваюцца работы па распілоўванні і вывазе драўніны. Дапамогу рамонтным брыгадам аказваюць у тым ліку падраздзяленні МНС.

Моцныя парывы ветру і дождж - такія складаныя ўмовы надвор’я захаваюцца і ў аўторак, 30 ліпеня. З-за цыклону аб'яўлена штармавое папярэджанне. У сярэдзіне тыдня інтэнсіўнасць дажджоў зменшыцца. Тым часам працягваецца і ліквідацыя наступстваў урагану, які абрынуўся на краіну ў сярэдзіне ліпеня.

А ў МНС нагадваюць: каб не стаць ахвярай непагадзі, трэба засвоіць шэраг нескладаных правіл. Не варта хавацца і пакідаць транспарт за прыпынкамі грамадскага транспарту, рэкламнымі шчытамі, недабудаванымі будынкамі і пад дрэвамі, бо вялікая верагоднасць іх падзення. Таксама смяротна небяспечна пры моцным ветры стаяць пад лініяй электраперадачы.