Майстар-класы для дзяцей і дарослых дае таленавітая Святлана Шайнова

Саломапляценне, валенне, стварэнне лялек. Сваім талентам шчодра дзеліцца майстрыха са Стоўбцаў Святлана Шайнова. Майстар-класы для дзяцей і дарослых праходзяць у цэнтры культуры, дзе і размясцілася выстава аўтара "Чароўны свет маіх захапленняў". Аб шматгранных захапленнях майстра народнай творчасці Ларыса Гулякевіч.

Майстар-клас "Саламяная кветка" ў Стаўбцоўскім цэнтры культуры

Вытанчаныя дробныя дэталі ў саломапляценні. Ад ювелірных вырабаў да букетаў, капелюшоў і вялікіх насценных панно.

Існуе стэрэатып, што саламяныя вырабы з часам збіраюць пыл і баяцца вільготнасці. Майстар Святлана Шайнова лічыць, што гэтыя творы мастацтва можна не толькі мыць, але і мяняць іх форму ў стане вільготнасці.

Каб саломка была паслухмянай, яе трэба добра падрыхтаваць, нарыхтаваць, а галоўнае - сабраць у свой час.

Сваё майстэрства Святлана Шайнова набыла ў Мірскім мастацкім прафесійна-тэхнічным каледжы - вывучала рэстаўрацыю дэкаратыўных тынковак і ляпных вырабаў. Адсюль і шматграннасць яе творчасці. На майстар-класах шчыра дзеліцца сваімі сакрэтамі, напрацоўкамі, нават фантазіямі.

Яе вучні розных узростаў і прафесій. У кожнага - асабістыя поспехі ў дэкаратыўна-прыкладным мастацтве. Стварэнне лялек - яшчэ адно захапленне майстра.

Выгляд яе гераінь здаецца знаёмым. Святлана ўвасабляе вобразы знакамітых асоб:любімая савецкая актрыса Таццяна Пельтцэр, беларуская легенда тэатра і кіно Стэфанія Станюта, чалавек-эпоха англійская каралева. Твары і рукі майстар лепіць з палімернай гліны. Сама шые вопратку і стварае аксесуары.

Валенне з воўны таксама ў трэндзе. Сувеніры, аксесуары, упрыгажэнні карыстаюцца вялікім поспехам у пакупнікоў на раённых, абласных і рэспубліканскіх кірмашах ды фестывалях. Ахвотна асвойваюць тэхніку валення і наведвальнікі гуртка.

Батлейка. Гэты напрамак творчасці стаіць асобна. Разам з сям'ёй майстрыха вывучае адпаведную літаратуру, казкі ды народныя легенды. Разам пішуць сцэнарыі, ствараюць характарных лялек.