У Мінску сёлета больш за 10 тысяч выпускнікоў

Пакуль адны толькі рыхтуюцца да навучальнага года, гэтыя навучэнцы назаўжды развіталіся са школьным перыядам. У сталіцы сёлета больш за 10 тысяч выпускнікоў. Цэнтралізаванае тэсціраванне для іх пачнецца ўжо заўтра. Першы прадмет - беларуская мова. Дзевяцікласнікі ж яшчэ атрымліваюць пасведчанні. Эмоцыі аднаго з выпускных вечароў і планы моладзі на будучыню ў Алены Вітко.

Упэўненыя ў сабе, натхнёныя і матываваныя на поспех. Менавіта такімі выпускнікі 2022 года развіталіся са школьным перыядам і зрабілі першы дарослы крок. Момант запамінальны, таму і падрыхтоўка была асаблівая. Юнакі на свецкі раўт падабралі строгія касцюмы і ператварыліся ў галантных кавалераў. А дзяўчаты здзіўлялі раскошнымі вячэрнімі сукенкамі.

Чырвоная дарожка, авацыі, дзясяткі фотакамер. Такая хвіліна славы - традыцыя 12-й гімназіі Мінска: адзінаццацікласнікаў сустракаюць як галівудскіх зорак.

Святочнай лакацыяй для выпускнога вечара стаў медуніверсітэт. Сімвалічна, бо хіміка-біялагічны профіль для 12-й гімназіі ключавы. Менавіта там у 1989 годзе адкрылі першы так званы медыцынскі клас. З тых часоў прафесійны шлях яшчэ са школы абралі больш за 750 урачоў.

Працаваць дзеля здароўя людзей вырашыла і Кацярына Скадорва. Сям'я падтрымала, бо ўсе яны вялікая дынастыя медыкаў. Бабуля і дзядуля, напрыклад, былі ўрачамі агульнай практыкі. Стаж кожнага - больш за 50 гадоў. Ветэраны працы, ёсць нават званне "Выдатнік аховы здароўя". Бацькі ж вопытныя дэрматолагі. Старэйшая сястра зараз студэнтка лячэбнага факультэта. Нядзіўна, што ўрачысты выпускны сумясцілі з экскурсіяй па альма-матар.

Сур'ёзная група падтрымкі і ў выпускніка Аляксея Чыжыкава. Успамінаюць, 11 гадоў таму 1-га верасня былі ў тым жа складзе, толькі прыводзілі маленькага гарэзу, а зараз сын і ўнук вышэйшы за ўсіх ростам. Развівацца плануе ў эканамічнай сферы, у сям'і ёсць з каго браць прыклад. Дарэчы, аб пераемнасці гавораць нават імёны: Аляксеяў тут ажно чатыры пакаленні.

Усяго ў 12-й сталічнай гімназіі сёлета больш за 90 выпускнікоў. 15 з іх - залатыя медалісты. Сімвалічна, на сцэну па атэстаты яны выйшлі разам з бацькамі.

Гэта не проста эрудыты - яны крэатыўныя і таленавітыя. Такая феерыя творчасці атрымалася ў падарунак сваякам і настаўнікам. Танцавалі і спявалі, запускалі сотні паветраных шароў. Прычым, флэшмобы аб'ядналі не толькі выпускнікоў, далучыліся бацькі. Здзіўлялі каларытным фламэнка і кранальным відэакліпам.

Толькі ў сталіцы больш за 10 тысяч выпускнікоў. Наперадзе ўступная кампанія. Першае выпрабаванне для абітурыентаў ужо заўтра - ЦТ па беларускай мове.