У Вілейскім краі завяршыўся 10-ы раённы пленэр юных мастакоў

На працягу двух тыдняў дзеці ад 9 да 16 гадоў з Любані і Вілейкі наведвалі мясцовыя славутасці, не толькі рабілі замалёўкі маляўнічых краявідаў, але і займаліся добраўпарадкаваннем гістарычных месцаў. Пра тое, як лета пішуць з натуры - Ларыса Гулякевіч.

Вілейскі пленэр - магчымасць раскрыцца юным талентам, своеасаблівая творчая справаздача, спроба дакрануцца да славутасцей роднага краю.

Сярод творчых заданняў не толькі пейзажныя эцюды, але і архітэктурныя аб'екты. Правільна паказаць напрамак святла і цені, выканаць прапорцыі і надаць малюнку мастацкі сэнс.

Яшчэ адно заданне пленэру: намаляваць гістарычны аб'ект, які не захаваўся ці раней выглядаў інакш. Так, напрыклад, будынак вілейскага вакзала 100 гадоў таму быў з чырвоным дахам. Паводле гістарычных звестак, выглядаў прыблізна такім чынам плюс эмоцыі і фантазіі аўтара.

Юныя мастакі вывучаюць гісторыю роднага краю не толькі па падручніках, але і па фотадакументах, уяўляюць, як выглядалі помнікі і будынкі, пераносяць свае веды і фантазіі на паперу.

На гэтым малюнку фарбы нібы танцуюць. Маленькая Аня, якой толькі 9 гадоў, першы раз удзельнічала ў пленэры і выказала свае пачуцці вось такім чынам.

Юлія Буданава малюе з натуры таксама ўпершыню. З фарбамі і алоўкамі сябруе з дзяцінства, але гурткоў па жывапісе ніколі не наведвала. Толькі дзякуючы мастацкаму пленэру вырашыла прадэманстраваць свае здольнасці.

Зараз куратар Юлі - школьная настаўніца па выяўленчым мастацтве - бачыць у юнай мастачцы вялікі патэнцыял. Яна ўдала спалучае абстракцыю з аўтарскай тэхнікай.

Сустрэчу мастакоў на прыродзе ў Вілейцы ладзяць ужо дзясяты год запар. Кожны раз яе прысвячаюць знакамітым асобам гэтага краю. Сярод славутых асоб мастак–авангардыст Уладзіслаў Стржамінскі, кампазітар і палітык Міхал Клеафас Агінскі. Сам жа пленэр традыцыйна носіць імя сусветна вядомага мастака, які тут нарадзіўся, Нікадзіма Сілівановіча. Яго мазаічнымі творамі ўпрыгожаны Ісакіеўскі сабор у Санкт-Пецярбургу.

Сёлетні пленэр прысвечаны і 80-годдзю пачатку Вялікай Айчыннай вайны. Таму невыпадкова ў праграме мерапрыемстваў добраўпарадкаванне тэрыторый гістарычных мясцін і помнікаў. А вынікам сустрэчы мастакоў на лоне прыроды стане тэматычная выстава.