Абуральныя факты парушэнняў выяўленыя ў аздараўленчым лагеры "Алімпіец"

У Гродзенскай вобласці спецыялісты дзяржкантролю выявілі абуральныя факты парушэнняў у аздараўленчым лагеры "Алімпіец". Яго і да "аздараўленчага" складана аднесці - прагнілая падлога, адсутнасць рамонту ў жылых пакоях. Так і з ганарлівай назвай "Алімпіец" неяк не стыкуецца адсутнасць спартыўнага інвентара. Ёсць пытанні і па бяспецы - на тэрыторыю лагера маюць доступ цалкам староннія людзі. Можа гэта такія "спартанскія ўмовы"? Юрый Карняловіч вывучыў асаблівасці дзіцячага адпачынку.

У спартыўным аздараўленчым лагеры "Алімпіец" адпачываюць будучыя чэмпіёны - выхаванцы дзіцячых спартыўных школ з усёй Гродзенскай вобласці. Трэніруюцца, выпрацоўваюць устойлівасць, волю да перамогі, вучацца пераадольваць сябе. І, як апынулася, яшчэ і бытавыя праблемы. У лагеры шмат гадоў не рабілі капітальны рамонт. Драўляныя вокны ў пакоях вось-вось разваляцца, у прагнілай падлозе не паспяваюць мяняць дошкі. Не лепшая сітуацыя і ў спартыўных залах лагера. Адказ у кіраўніцтва адзін - няма грошай.

Кардынальна змяніць сітуацыю ў лагеры плануюць у наступным годзе. А пакуль ужо чацвёртая змена будзе прыстасоўвацца жыць і трэніравацца ў такіх умовах.

І яшчэ. Як апынулася, на тэрыторыю лагера, нягледзячы на ахову, могуць трапіць староннія людзі. Больш за тое, яны тут жывуць.

Вось у гэтым двухпавярховым доме, які знаходзіцца на тэрыторыі дзіцячага лагера і лічыцца на яго балансе, пражываюць цалкам староннія людзі. Ніякіх дакументаў і дазволаў у іх няма. І як яны тут апынуліся, дырэктар растлумачыць не можа. Гаворыць, на пасадзе ўсяго некалькі месяцаў і проста не было часу разабрацца з незаконнымі жыхарамі.

Дапамагаць разбірацца з праблемамі ў "Алімпійцы" зараз будуць спецыялісты дзяржкантролю.

У суседнім Шчучынскім раёне ў дзіцячым лагеры "Касмадром" сітуацыя зусім іншая. Да новага аздараўленчага сезона тут рыхтуюцца загадзя. Капітальны рамонт таксама правялі. З ахвочых адпачыць у "Касмадроме" заўсёды чарга.

Спецыялісты дзяржкантролю прадоўжаць маніторыць сітуацыю ў дзіцячых лагерах і не толькі Гродзенскага рэгіёна, а па ўсёй краіне. Зараз адпачываюць дзеці чацвёртай змены. Таму недахопы, калі яны ёсць, павінны быць ухіленыя. Калі не да канца гэтага сезона, то да пачатку новага абавязкова.