Зорны спецрэйс сёння прыбыў на чыгуначны вакзал Віцебска

Усе дарогі сёння вядуць у Віцебск! Тут адкрываецца XXIX Міжнародны фестываль мастацтваў "Славянскі базар". Ён падоўжыцца чатыры дні і стане самым буйным праектам open-air у Еўропе.

І хоць цягнікі міжнародных ліній зараз не курсіруюць па ранейшым графіку, для фестывалю зрабілі выключэнне. Састаў па маршруце Масква - Віцебск прыбыў на світанку - у 6:30 раніцы. Пасажыры - удзельнікі Міжнароднага фестывалю мастацтваў "Славянскі базар": спевакі, танцоры, члены тэхнічнай каманды артыстаў. Маршрут не толькі самы бяспечны, але і даволі хуткі: у дарозе госці форуму правялі не больш за восем гадзін. Гэта дазволіла не адысці ад рэпетыцыйнага графіка. З 10 раніцы на галоўнай пляцоўцы фестывалю - у Летнім амфітэатры - пачнуцца прагоны вячэрняга канцэрта-адкрыцця.

На "Славянскі базар" артысты дабіраюцца і самастойна. Шматлікія зоркі аддаюць перавагу асабістаму наземнаму транспарту, а таксама палётам на прыватных рэйсах. У вялікім вячэрнім гала-канцэрце прымуць удзел вядомыя і любімыя артысты: Філіп Кіркораў, Аляксандр Буйноў, Алена Ваенга, Алег Газманаў, Алёна Ланская, Іна Афанасьева, калектывы "Песняры" і "Сябры".