Грамадзяне ЕАЭС маюць роўныя правы пры працаўладкаванні ў любой краіне "пяцёркі"

Падмурак ЕАЭС - эканамічная свабода і роўныя ўмовы гаспадарання. Свабода перамяшчэння і свабода рабочай сілы - гэта тэмы, якія абмяркоўваюць на чацвёртай секцыі Еўразійскага эканамічнага форуму.

Ва ўсіх грамадзян краін ЕАЭС ёсць роўныя правы пры працаўладкаванні ў любой краіне "пяцёркі". Нават больш - незалежна ад таго, адкуль чалавек родам і дзе працаваў (у Расіі, у Казахстане або Кыргызстане), ён зможа атрымаць пенсію.

Тры дакументы патрэбныя для працаўладкавання: пашпарт, дыплом аб адукацыі (або пасведчанне аб кваліфікацыі) і працоўная кніжка.

Важна, што ў краінах ЕАЭС узаемнае прызнанне дыпломаў (акрамя медыкаў і фармацэўтаў). Ёсць пагадненне аб узаемным прызнанні навуковых ступеняў. Складзены і пастаянна абнаўляецца спіс запатрабаваных прафесій для рынку ЕАЭС. А гэтая добрая дапамога пры фарміраванні плана набору ў навучальныя ўстановы.

"Калі паглядзець на рэальную сітуацыю з міграцыйнымі патокамі, вядома ж, цэнтр прыцягнення сёння - рынак працы Расійскай Федэрацыі. Гэта абумоўлена вялікім выбарам рабочых месцаў, добрым узроўнем аплаты працы. Донарам на гэтым саюзным міграцыйным працоўным рынку выступае перш за ўсё Кыргызская рэспубліка. І зыходзячы з гэтага, кожная краіна вызначае свае падыходы. Вядома ж, кожная з краін, у тым ліку і Рэспубліка Беларусь, вельмі зацікаўлена ў задзейнічанні высокакваліфікаваных рабочых рук. На рынку працы сёння ў Беларусі дастаткова вялікі попыт на рабочую сілу", - падкрэсліла старшыня Пастаяннай камісіі Палаты прадстаўнікоў Нацыянальнага сходу Беларусі Ірына Касцевіч.

Яна адзначыла, што роўныя правы маюць не толькі грамадзяне, якія працаўладкаваліся ў краінах ЕАЭС, але і іх дзеці. Яны могуць свабодна наведваць дзіцячыя сады і школы, маюць права атрымліваць своечасовую медыцынскую дапамогу.