Адсутнасць электрычнасці, пашкоджаныя аўто, паваленыя дрэвы - наступствы стыхіі ў Калодзішчах

Ратавальнікі ліквідуюць наступствы непагадзі ў Мінскай вобласці.

Паводле аператыўных звестак, вечарам 29 ліпеня з-за моцных ападкаў былі падтоплены 40 участкаў аўтамабільных дарог у Мінску. Работнікі МНС адпампоўвалі ваду з падтопленых памяшканняў хола гатэля, прыватнага жылога дома. Зафіксаваны выпадкі спынення грамадскага транспарту. З-за праходжання навальнічнага фронту з парывамі ветру на тэрыторыі Мінскай вобласці пацярпелі населены пункт і садовае таварыства. Зафіксавана больш за 1 700 выпадкаў падзення дрэў, пашкоджаны 10 аўтамабіляў. Пацярпелых няма.

Больш за ўсё моц стыхіі на сабе адчулі жыхары аграгарадка Калодзішчы, дзе ўпалае дрэва пашкодзіла наземны газаправод. Без газазабеспячэння застаецца 1 прыватны жылы дом. А з-за абарваных ліній электраперадачы без электрычнасці застаюцца 600 дамоў. Адключэнні аператыўна ліквідуюцца аварыйнымі брыгадамі. Уначы ў выканкаме Мінскага раёна працавала камісія па надзвычайнай сітуацыі.

Мясцовыя жыхары ў сацсетках публікуюць наступствы стыхіі. На фота і відэа можна ўбачыць разбітыя вокны ў кватэрах, пашкоджаныя аўтамабілі, паваленыя дрэвы і іншыя разбурэнні.