45 кг мясных пачастункаў разыграюць у гонар юбілею Камароўкі

У Мінску праходзяць святочныя гулянні, прымеркаваныя да 100-годдзя Беларускага радыё і 45-годдзя Камароўскага рынку.

На плошчы каля Камароўкі разгарнуліся маштабныя гулянні. Сёлета юбілеі адзначаюць Беларускае радыё і Камароўскі рынак. У суботу, 31 мая людзей прыйшло сапраўды шмат. Гэта добрае пацвярджэнне таго, што пераменлівае надвор'е для беларусаў не перашкода, асабліва калі размова ідзе пра найбуйнейшыя брэнды нашай краіны.

У праграме выхаднога дня - гучныя акорды Сімфанічнага аркестра Белтэлерадыёкампаніі, высокія ноты фіналісткі шоу X-Factor Belarus Карыны Ерафеевай, народныя матывы ад ансамбля "Бяседа" і многае іншае. На інтэрактыўных зонах праводзяцца розныя конкурсы, а фуд-корты прапаноўваюць смачныя пачастункі.

Для самых актыўных гледачоў і слухачоў віноўнікі ўрачыстасці - Камароўскі рынак і Дом радыё - разыгрываюць вялікую колькасць прызоў. Але галоўная ўзнагарода - гэта кошык з 45 кг мясных пачастункаў. Праграма прадоўжыцца да 20:00.