Лукашэнка: Міласэрнасць, гуманізм і салідарнасць блізкія як Мальтыйскаму ордэну, так і Беларусі

Прэзідэнт Беларусі Аляксандр Лукашэнка павіншаваў Князя і Вялікага магістра Суверэннага Ваеннага Ордэна Гаспітальераў Святога Іаана Іерусалімскага, Родаса і Мальты Фра Джона Данлэпа з Днём Святога Іаана Хрысціцеля. Аб гэтым паведамляе БЕЛТА са спасылкай на прэс-службу беларускага лідара.

Кіраўнік дзяржавы адзначыў, што прынцыпы, якімі на працягу стагоддзяў кіруецца ордэн, - міласэрнасць, гуманізм і салідарнасць - блізкія і Беларусі. "Мы падзяляем перакананне ў тым, што клопат аб чалавеку, дапамога слабым і бяздольным, імкненне да дыялогу і ўзаемаразумення з’яўляюцца фундаментальнымі асновамі справядлівага і гарманічнага светапарадку", - гаворыцца ў віншаванні.

Асаблівы сэнс, паводле слоў Прэзідэнта, мае сёлетні юбілейны год, які адзначаецца Каталіцкім Касцёлам як Год надзеі. "Гэта час духоўнага абнаўлення, умацавання ўніверсальных каштоўнасцей і салідарнасці. Лічу, дзейнасць Мальтыйскага ордэна, напоўненая служэннем і спагадай, будзе займаць дастойнае месца ў справе імкнення да спакою і духоўнага адраджэння, - падкрэсліў Аляксандр Лукашэнка. - Няхай выпрабаванні сучаснасці стануць стымулам для пераасэнсавання, пошуку шляхоў прымірэння і паглыблення міжнароднага супрацоўніцтва".

Прэзідэнт Беларусі пажадаў Князю і Вялікаму магістру моцнага здароўя і дабрабыту, а Мальтыйскаму ордэну - далейшага працвітання.