"Першы інфармацыйны" і "Беларусь 24" прэзентуюць свае магчымасці на медыярынку Блізкага Усходу

Белтэлерадыёкампанія пашырае супрацоўніцтва на Блізкім Усходзе! На найбуйнейшай медыявыставе CabSat у ААЭ прадстаўнікі найбуйнейшага холдынгу Беларусі прэзентавалі магчымасці тэлеканала "Першы інфармацыйны" і міжнароднага спадарожнікавага вяшчання "Беларусь 24".

Прадстаўнікі Белтэлерадыёкампаніі пазнаёмілі ўдзельнікаў і гасцей з разнастайнасцю беларускага кантэнту: ад праграм пра культуру і турызм да дакументальных фільмаў і промаматэрыялаў. Адзначым, медыявыстава CabSat - гэта вядучая платформа для індустрыі вяшчання, спадарожнікавага тэлебачання і кантэнту для краін Блізкага Усходу, Паўночнай Афрыкі і Паўднёвай Азіі. Удзел прынялі больш як 450 медыякампаній з 120 краін.

Важны акцэнт - на ўмацаванне супрацоўніцтва і пошуку новых магчымасцяў для прасоўвання беларускага кантэнту на медыярынках Арабскіх Эміратаў, Саудаўскай Аравіі, Егіпта, Турцыі і шэрагу іншых афрыканскіх і азіяцкіх краін.

У рамках візіту асаблівую ўвагу надалі і вывучэнню медыярынку Арабскіх Эміратаў. Беларуская дэлегацыя правяла шэраг сустрэч з прадстаўнікамі профільных ведамстваў ААЭ і наведала найбуйнейшыя медыяхолдынгі краіны, азнаёміўшыся з іх падыходамі да вяшчання і вытворчасці кантэнту.