Саміт ЕС даручыў ЕК распрацаваць дарожную карту па павелічэнні ваенных выдаткаў супольнасці

Саміт ЕС даручыў Еўракамісіі распрацаваць дарожную карту фінансавання мілітарызацыі супольнасці да наступнай сустрэчы на вышэйшым узроўні ў кастрычніку.

Такім чынам будуць створаны ўмовы для выканання рашэння НАТА аб павелічэнні ў 2,5 раза ваенных выдаткаў краін кантынента. Аб гэтым заявіў кіраўнік Еўрапейскага савета Антоніу Кошта.

Кіраўнік Еўракамісіі Урсула фон дэр Ляен у сваю чаргу паабяцала спрасціць бюракратычныя абмежаванні і экалагічныя нормы, а таксама правілы прадастаўлення дзяржаўнай дапамогі для ваенных інвестыцый. Паводле яе слоў, 16 з 27 краін ЕС ужо запыталі ў Еўракамісіі магчымасць павялічыць дэфіцыт сваіх дзяржбюджэтаў на 1,5 % у найбліжэйшыя гады, каб прыцягнуць дадатковыя крэдыты на ваенныя патрэбы.

Кіраўнік ЕК заклікала астатнія дзяржавы ЕС "скарыстацца гэтай магчымасцю" для павышэння сваіх ваенных выдаткаў.