У БДПУ зацверджана 416 месцаў для абітурыентаў па мэтавым накіраванні

У Беларусі пачаўся прыём дакументаў на мэтавую падрыхтоўку ў ВНУ. Усяго сёлета зацверджана каля 6 600 мэтавых месцаў. З іх 1 тыс. для будучых педагогаў. Так, у Беларускім дзяржаўным педагагічным універсітэце імя Максіма Танка для гэтай катэгорыі абітурыентаў адведзена 416 месцаў. У топе напрамкаў - пачатковая адукацыя, фізіка-матэматычная, спецыяльная і інклюзіўная.

27 чэрвеня ў БДПУ пачаўся прыём дакументаў ад абітурыентаў, якія паступаюць на ўмовах мэтавай падрыхтоўкі.

Таксама з гэтага дня будзе праходзіць сумоўе з выпускнікамі ўстаноў агульнай сярэдняй адукацыі профільнай накіраванасці (педагагічнай, спартыўна-педагагічнай, інжынернай).

Падчас прыёму дакументаў для абітурыентаў педагагічных класаў будзе працаваць зона профільнай падтрымкі - унікальнае месца, у якім абітурыенты і ўдзельнікі адзінага ў Беларусі клуба выпускнікоў педкласаў "ПРОФіль+" абмяркоўваюць пытанні ўступнай кампаніі, што іх цікавяць, абменьваюцца ўражаннямі, аказваюць неабходную эмацыянальную падтрымку адно аднаму да і пасля сумоўя.

Уступныя выпрабаванні пройдуць з 4 па 10 ліпеня. Дакументы ў абітурыентаў, якія паступаюць па мэтавым накіраванні, прымаюць да 2 ліпеня ўключна. Прыёмныя камісіі працуюць без выхадных з 9 да 18 гадзін.