Якія ўнікальныя аперацыі ў малаінвазіўнай хірургіі сёння даступныя беларусам

Захоўваючы сваю ідэнтычнасць, беларусы адкрыты да інавацый. Гэта датычыцца ўсіх сфер жыцця, і медыцыны ў тым ліку. Мінімальная траўматызацыя, хуткае аднаўленне і як вынік - паляпшэнне якасці жыцця пацыентаў. Не першы год у Мінскай абласной клінічнай бальніцы праводзяць унікальныя малаінвазіўныя аперацыі. Гэта стала магчымым дзякуючы ўкараненню інавацыйных тэхналогій.

Экстранны выпадак. Шпіталізацыя. І адразу на аперацыйны стол. Усё гэта для жыхаркі Заслаўя Вольгі Зайчук зараз у мінулым. Аператыўныя дзеянні ўрачоў і інавацыйныя медыцынскія тэхналогіі захавалі жанчыне жыццё. У Мінскай абласной клінічнай бальніцы пацыентцы правялі лапараскапічную аперацыю.

"Літаральна на трэці-чацвёрты дзень нават не адчувалася, што мне зрабілі аперацыю. Пасля рэанімацыі я ўстала адразу", - расказала Вольга.

Унікальныя малаінвазіўныя аперацыі ўрачы абласной клінічнай бальніцы выконваюць штодня. Увесь спектр высокатэхналагічнай дапамогі даступны па сямі профілях - ад агульнай і сасудзістаай хірургіі да ўралогіі. Штогод спецыялісты праводзяць да некалькіх тысяч такіх умяшанняў.

Ягор Баравік, намеснік галоўнага ўрача Мінскай абласной клінічнай бальніцы:

"Мы перайшлі да вялікіх аперацый на падстраўнікавай залозе, печані, на тоўстай кішцы, і ў тым ліку нават былі выпадкі, калі ўдавалася выканаць лапараскапічным спосабам выдаленне ўсяго страўніка. Усё гэта праз маленькія разрэзы. Асноўная задача малаінвазіўных тэхналогій - гэта зніжэнне болевага сіндрому, паляпшэнне праходжання пасляаперацыйнага перыяду і наогул паляпшэнне ўсіх ранніх вынікаў хірургічнага ўмяшання".

Укараненне эксклюзіўных тэхналогій у медыцыну - працэс пастаянны і бесперапынны. Шмат у чым ён магчымы дзякуючы навучанню кадраў.

Акрамя малаінвазіўных тэхналогій у абласной клінічнай бальніцы выконваюцца і ўнікальныя рэканструкцыйныя аперацыі на падстраўнікавай залозе. У сярэднім такая аперацыя доўжыцца ад 3 да 6 гадзін. Час значны, але апраўданы. Пасля старанняў урачоў якасць жыцця пацыента істотна паляпшаецца.

Якасная высокатэхналагічная дапамога побач. У клініках Мінскай вобласці ёсць і неабходнае абсталяванне, і высокакваліфікаваныя кадры. А атрымаць дапамогу можа кожны жыхар рэспублікі. Галоўнае - своечасова звярнуцца.