Мінскі планетарый просіць дапамогі ў відавочцаў падзення метэарыта ў Смалявіцкім раёне

Мінскі планетарый просіць дапамогі ў відавочцаў. 25 снежня камеры Беларускай метэарытнай сеткі зафіксавалі супербалід. Ён праляцеў над сталіцай і ўпаў каля райцэнтра Смалявічы ў выглядзе метэарытаў.

Агульная маса рэчыва ацэньваецца ў некалькі кілаграмаў. Жыхароў вёсак Рабы Слуп, Прысынак, Калюга, Чорны лес, Высокія Ляды просяць звяртаць увагу на незвычайныя камяні розных памераў, што ляжаць на паверхні.

Метэарыт можа мець чорную асмаленую корку з расколінамі і сколамі, чорную аплаўленую матавую паверхню або карычневы ржава-буры колер. Таксама ён павінен прыцягваць магніт і быць шчыльным, не друзлым.

Нябесны камень мае вялікае навуковае значэнне, ён можа стаць шостым вядомым метэарытам на тэрыторыі Беларусі.