21 студзеня ў Беларусі пачынаецца датэрміновае галасаванне на выбарах Прэзідэнта

У самую актыўную фазу выходзіць электаральная кампанія. Заўтра, 21 студзеня, у Беларусі пачынаецца датэрміновае галасаванне. Гэта агульнасусветная практыка, якая ў першую чаргу зручная для выбаршчыка. З адкрыццём участкаў для галасавання, роўна а 12-й, таксама пачне сваю працу Цэнтр грамадскага назірання за выбарамі.

Прадстаўнікі грамадскіх арганізацый будуць у аператыўным рэжыме інфарміраваць СМІ аб усім, што адбываецца на ўчастках. А цікавасць да выбараў у Беларусі сёння адчуваецца абсалютна з розных кантынентаў. Гэта пацвярджае геаграфія акрэдытаваных у інфацэнтры ЦВК журналістаў - Катар, Венесуэла, Францыя, Расія. Гэта найбуйнейшыя сусветныя медыя, больш як 8 соцень журналістаў. Адкрыццё інфацэнтра запланавана на 24 студзеня. Відавочна наперадзе насычаны тыдзень, дні, калі аб'ядноўваецца ўся Беларусь.