Па гарачых слядах: на беларускай мяжы затрыманы згоншчык аўто

На адной з беларускіх меж па гарачых слядах затрыманы аўтазгоншчык. Мужчына ў Мінску знайшоў незапёртую машыну з ключамі, даехаў на ёй да мяжы і там кінуў аўто. Перасекчы мяжу ён планаваў на маршрутцы, але быў затрыманы. Па камерах відэаназірання сталічныя аператыўнікі вылічылі выкрадальніка аўто. Далей далучылі калег з мытнага і памежнага камітэтаў. Яны і затрымалі згоншчыка.

Андрэй Арлоўскі, намеснік начальніка крымінальнага вышуку ГУУС Мінгарвыканкама:

"Устаноўлена: напярэдадні мужчына пасварыўся са сваёй жонкай-беларускай, з якой пражываў у Мінскім раёне, і вырашыў вярнуцца на радзіму. У адным са сталічных двароў знайшоў незапёртае аўто з ключамі ў салоне. Даехаўшы да мяжы, кінуў чужы транспарт і паспрабаваў выехаць з краіны на маршрутцы".

Узбуджана крымінальная справа. Міліцыя нагадвае: каб не стаць ахвярай згоншчыкаў, закрывайце асабісты транспарт і не пакідайце ў салоне нічога каштоўнага.