Падчас ДТЗ у Івацэвіцкім раёне загінулі два чалавекі

У Івацэвіцкім раёне ў ДТЗ загінулі два чалавекі, яшчэ адзін пацярпеў, паведамляе БЕЛТА са спасылкай на МУС.

Аварыя адбылася 31 мая каля 2:20 у Івацэвіцкім раёне на аўтадарозе Н26414 Волька - Дабрамысль паблізу вёскі Закаплічча. 28-гадовы вадзіцель-бяспраўнік аўтамабіля Ford, паводле папярэдняй інфармацыі, не справіўся з кіраваннем. У выніку аўто ўрэзалася ў прыдарожнае дрэва.

Вадзіцель і 29-гадовы пасажыр загінулі, яшчэ адзін 25-гадовы пасажыр шпіталізаваны. Устаноўлена, што ніхто з іх не быў прышпілены рамянямі бяспекі.

На месцы здарэння працавалі супрацоўнікі ДАІ, МНС, следча-аператыўная група.

"Забараняецца кіраваць транспартным сродкам без вадзіцельскага пасведчання. Усе, хто знаходзіцца ў аўтамабілі, павінны быць прышпілены рамянямі бяспекі", - нагадалі ў МУС.