Следчыя працуюць на месцы смяротнага ДТЗ у Мінскім раёне

28 чэрвеня пад Мінскам адбылося ДТЗ са смяротным зыходам. Паводле папярэдняй інфармацыі, 26-гадовы вадзіцель аўтамабіля Mercedes, знаходзячыся ў стане алкагольнага ап'янення, рухаўся па аўтадарозе М2 у кірунку Нацыянальнага аэрапорта Мінск і сутыкнуўся з аўтамабілем таксі Skoda, які ад удару адкінула ў дарожную агароджу. Загінулі 4 пасажыры таксі: 75-гадовая жанчына, яе 43-гадовая дачка і дзве ўнучкі - 13 і 7 гадоў. Усе яны грамадзяне Расіі.

Сяргей Бандарэнка, начальнік УДАІ УУС Мінаблвыканкама: "28 чэрвеня каля пяці раніцы на 20-м кіламетры аўтадарогі М2 адбылося дарожна-транспартнае здарэнне з удзелам аўтамабіляў Mercedes і Skoda. Вадзіцель Mercedes, знаходзячыся ў стане алкагольнага ап'янення, учыніў спадарожнае сутыкненне з аўтамабілем таксі Skoda. У салоне таксі, акрамя вадзіцеля, знаходзіліся двое дарослых і двое дзяцей. Усе пасажыры Skoda памерлі на месцы. Вадзіцель таксі з цяжкімі траўмамі быў шпіталізаваны. Дзяржаўтаінспекцыя працягвае працаваць ва ўзмоцненым рэжыме і прымае самыя жорсткія меры ў дачыненні да грубых парушальнікаў".

Прадстаўнік Дзяржаўтаінспекцыі нагадаў, што кіраванне транспартным сродкам у стане ап'янення катэгарычна забаронена. "Калі вы сталі сведкам таго, што за рулём знаходзіцца чалавек з прыкметамі ап'янення, неадкладна паведаміце аб гэтым па нумары 102. Гэта можа выратаваць жыцці", - нагадаў начальнік УДАІ УУС Мінаблвыканкама.

Вадзіцель і пасажыр аўто Mercedes не пацярпелі. У крыві ў 26-гадовага вадзіцеля выяўлена 1,67 праміле алкаголю. У дачыненні да яго ўзбуджана крымінальная справа па ч. 5 арт. 317 (парушэнне правіл дарожнага руху асобай, якая кіравала транспартным сродкам у стане алкагольнага ап'янення, што пацягнула па неасцярожнасці смерць двух і больш чалавек) Крымінальнага кодэкса. Высвятляюцца усе акалічнасці здарэння.