Даведаліся, колькі грошай прынеслі форумы рэгіёнаў Беларусі і Расіі

Сукупны эканамічны эфект ад форумаў рэгіёнаў Беларусі і Расіі назваў намеснік прэм'ер-міністра Юрый Шулейка, паведамляе БЕЛТА.

Гаворачы пра супрацоўніцтва краін - удзельніц СНД на I Форуме рэгіёнаў у Ташкенце, ён адзначыў, што ў кожнай з іх наладжаны двухбаковыя рэгіянальныя эканамічныя і культурныя сувязі.

"Мы правялі ўжо 11 форумаў рэгіёнаў Беларусі і Расіі, сукупны эканамічны эфект ад якіх лічыцца на ўзроўні 7 млрд долараў", - падзяліўся Шулейка.

А паміж абласцямі Беларусі і дзяржавамі СНД дзейнічае больш за 200 дакументаў аб супрацоўніцтве ў розных сферах.

Шулейка таксама нагадаў, што ў лютым 2024 года ў Ташкенце прайшоў II Форум рэгіёнаў Беларусі і Узбекістана.

Па яго выніках склалі больш за 20 кантрактаў прыкладна на 80 млн долараў.

XII Форум рэгіёнаў Беларусі і Расіі запланаваны на 25-27 чэрвеня 2025 года ў Ніжнім Ноўгарадзе. Раней паведамлялася, што ён будзе прысвечаны перш за ўсё моладзевай палітыцы і спадчыне Вялікай Перамогі.