Рыжанкоў: Беларусь чакае адабрэння сваёй заяўкі на ўступленне ў БРІКС найбліжэйшым часам

Беларусь чакае адабрэння сваёй заяўкі на ўступленне ў БРІКС найбліжэйшым часам. Пра гэта заявіў міністр замежных спраў Беларусі Максім Рыжанкоў на палях Генасамблеі ААН.

Паводле яго словаў, першая хваля пашырэння БРІКС адбудзецца на саміце аб'яднання ў Казані ў кастрычніку і закране каля дзясятка краін. Спіс гэтых дзяржаў - адзначыў кіраўнік МЗС нашай краіны - фармулюе расійскае старшынства.

На палях Генеральнай асамблеі ААН кіраўнік МЗС нашай краіны выступіў на міністэрскай сустрэчы Групы сяброў у абарону Статуту ААН і Групы сяброў альянсу цывілізацый.

Таксама Максім Рыжанкоў правёў двухбаковыя перамовы з калегамі з Кубы, Сірыі, Венесуэлы і Зімбабвэ. Наперадзе - выступленне з высокай трыбуны ААН.