Сталі вядомыя вынікі экзітполу на выбарах Прэзідэнта Беларусі

Падведзены вынікі апытання выбаршчыкаў па методыцы экзітполу на выбарах Прэзідэнта Беларусі, іх агучылі ў эфіры "Першага інфармацыйнага".

Па выніках апытання, за кандыдата ў Прэзідэнты Рэспублікі Беларусь Алега Гайдукевіча прагаласавала 1,8 % апытаных; за Ганну Канапацкую - 1,6 %; за Аляксандра Лукашэнку - 87,6 %. Сяргей Сыранкоў набраў 2,7 % галасоў апытаных выбаршчыкаў, Аляксандр Хіжняк - 1,2 %, супраць усіх - 5,1 %.

Апытанне, паводле сацыялагічнай выбаркі, праходзіла на 320 участках. На працягу ўсяго дня з моманту адкрыцця ўчасткаў для галасавання (з 8:00) да завяршэння іх працы інтэрв'юеры ў колькасці 1 тыс. чалавек апытвалі выбаршчыкаў. Апытанне было ананімным. У рэспандэнтаў пыталіся, за каго з кандыдатаў яны прагаласавалі.

Усяго было апытана 11 948 чалавек.

Старшыня Беларускага камітэта маладзёжных арганізацый Павел Алекса адзначыў, што выбарка была рэпрэзентатыўнай. "Наша арганізацыя праводзіла такія даследаванні ў 2010, 2015 і 2020 гадах. Гэты год не стаў выключэннем. Нам было цікава, як і многім тэлегледачам, як прагаласавалі выбаршчыкі", - сказаў Павел Алекса.

Апытанні праводзіліся па ўсёй краіне - як у буйных гарадах, так і ў невялікіх населеных пунктах. Кіраўнік Беларускага камітэта маладзёжных арганізацый назваў іх выдатнай формай атрымання зваротнай сувязі. Людзі актыўна размаўлялі з інтэрв'юерамі, адкрыта называлі кандыдатаў, за якіх аддавалі свае галасы.