У Маскве пройдзе 45-е пасяджэнне Еўразійскага міжурадавага савета

11 снежня ў Маскве пройдзе чарговае пасяджэнне Еўразійскага міжурадавага савета. Яно з'яўляецца 45-м па ліку з пачатку работы ЕАЭС і 4-м сёлета.

На парадку дня пытанні інтэграцыйнай палітыкі.

У 2025 годзе ў органах Еўразійскага эканамічнага саюза старшынствуе Беларусь. Наша краіна зрабіла акцэнт на развіцці тэхналагічнага патэнцыялу і кааперацыі, павышэнні харчовай бяспекі, завяршэнні фарміравання адзінай транспартнай прасторы, а таксама выраўноўванні ўмоў для развіцця эканомік.

На папярэднім пасяджэнні ў Мінску кіраўнікі ўрадаў краін ЕАЭС падпісалі шэраг тэхнічных дакументаў і разгледзелі актуальныя пытанні. Перш за ўсё гэта ўкараненне лічбавых тэхналогій, развіццё транспартнай інфраструктуры, кантроль таварных патокаў, садзейнічанне кааперацыйным праектам прамысловасці і АПК.