Лукашэнка і Пуцін падпішуць шэраг важных дакументаў у Палацы Незалежнасці ў Мінску

Ключавыя пытанні інтэграцыі сёння разгледзяць у Палацы Незалежнасці. Тут некалькі хвілін таму далі старт пасяджэнню Вышэйшага дзяржсавета Саюзнай дзяржавы. Усе ўдзельнікі ў зборы. Пачалі з сумеснага фатаграфавання. Да лідараў для так званага family photo далучыліся вышэйшыя службовыя асобы.

Сустрэча праходзіць напярэдадні 25-годдзя падпісання Дагавора аб стварэнні Саюзнай дзяржавы. Да юбілейнай даты Мінск і Масква падыходзяць з добрымі эканамічнымі вынікамі. Пачынаючы з 1999 года, істотна вырас аб'ём ВУП.

У Беларусі больш як у 6 разоў, у Расіі - у 10. Узаемны тавараабарот паміж дзвюма краінамі працягвае павялічвацца. Паводле папярэдніх звестак, гандаль абновіць гістарычны максімум і ўшчыльную наблізіцца да адзнакі 60 млрд долараў. І самае галоўнае, што эфект ад інтэграцыі адчуваюць грамадзяне. Праца Саюзнай дзяржавы перш за ўсё накіравана на паляпшэнне жыцця людзей.

Чакаецца, што на палях пасяджэння Вышэйшага дзяржсавета Аляксандр Лукашэнка і Уладзімір Пуцін падпішуць шэраг важных дакументаў. У першую чаргу размова пра далейшае развіццё інтэграцыі і ўмацаванне суверэнітэту і бяспекі. На парадку дня каля 10 пытанняў, у тым ліку фарміраванне аб'яднанага рынку электраэнергіі, адмена роўмінгу паміж Беларуссю і Расіяй, абарона правоў спажыўцоў і падрыхтоўка да будучай знакавай даты ў нашай саюзнай гісторыі. У наступным годзе адзначым 80-годдзе Вялікай Перамогі.