На фестывалі "Дажынкі" ў Карме Аляксандр Лукашэнка ўзнагародзіў працаўнікоў сяла

Прэзідэнт Беларусі Аляксандр Лукашэнка 12 кастрычніка прыняў удзел ва ўрачыстай цырымоніі ўшаноўвання аграрыяў на фестывалі-кірмашы "Дажынкі-2024" у гарадскім пасёлку Карма, паведаміла БЕЛТА.

"Так ужо павялося, што самая гарачая пара ў селяніна - вясна і лета, а "Дажынкі" мы заўсёды адзначаем пад промнямі не вельмі яркага восеньскага сонца. І вам, працаўнікам цэха пад адкрытым небам, да перамен не прывыкаць. Нізкі паклон за вашу працу. За цярпенне і ўменне працаваць насуперак усім нягодам і акалічнасцям. Такім, ад якіх нават могуць апусціцца рукі. Але не ў вас", - заявіў Аляксандр Лукашэнка.

Ордэн Пашаны кіраўнік дзяржавы ўручыў вадзіцелю прадпрыемства "Калінінскі" Добрушскага раёна Аляксандру Старацітараву. Медаль "За працоўныя заслугі" з рук Прэзідэнта атрымалі вадзіцель агракамбіната "Холмеч" Рэчыцкага раёна Аляксандр Забіран, трактарыст-машыніст ААТ "Отар" Чачэрскага раёна Міхаіл Міненкоў і трактарыст-машыніст ААТ "Сцяг Радзімы" Гомельскага раёна Мікалай Чыгарэўскі.

Нагрудны знак да ганаровага звання "Заслужаны работнік сельскай гаспадаркі Рэспублікі Беларусь" Аляксандр Лукашэнка ўручыў дырэктару ААТ "Зорка" Чачэрскага раёна Галіне Трыбунах, а спецыяльныя лісты аб аб'яўленні Падзякі Прэзідэнта - вядучаму інжынеру-тэхнолагу Палескага вытворчага ўчастка ААТ "Мілкавіта" Святлане Атрошчанцы і трактарысту-машыністу КСУП "Судкова" Хойніцкага раёна Алене Волкавай, аператару аўтамата па вытворчасці вараных каўбас мясаперапрацоўчага цэха Жлобінскага мясакамбіната Раісе Дзегцяровай, аператару машыннага даення ААТ "Шлях Ільіча" Лельчыцкага раёна Святлане Жогле, галоўнаму заатэхніку-селекцыянеру ААТ "Ціхінічы" Рагачоўскага раёна Тамары Каравіцкай, галоўнаму заатэхніку СПК "50 гадоў Кастрычніка" Рэчыцкага раёна Ніне Пішчык, вадзіцелю грузавога аўтамабіля ААТ "Імя Жукава" Брагінскага раёна Уладзіміру Шахніцкаму.

Падзякі Прэзідэнта таксама быў удастоены калектыў работнікаў сельскагаспадарчага ўнітарнага прадпрыемства "Палессе-Аграінвест" Петрыкаўскага раёна.

Пасля цырымоніі ўзнагароджання кіраўніку дзяржавы ўручылі святочны каравай ад хлебаробаў Гомельшчыны.