Прэзідэнт Беларусі накіраваўся з візітам у Расію для ўдзелу ў самітах СНД і ЕАЭС

Прэзідэнт Беларусі Аляксандр Лукашэнка накіраваўся з рабочым візітам у Расійскую Федэрацыю для ўдзелу ў самітах Садружнасці Незалежных Дзяржаў і Еўразійскага эканамічнага саюза. Пра гэта паведамляе БЕЛТА са спасылкай на  прэс-службу беларускага лідара.

Традыцыйная нефармальная сустрэча кіраўнікоў дзяржаў - удзельнікаў СНД адбудзецца 25 снежня ў Санкт-Пецярбургу. Лідары краін Садружнасці падвядуць вынікі года і абмяркуюць перспектывы інтэграцыйнага ўзаемадзеяння.

Аляксандр Лукашэнка 26 снежня таксама возьме ўдзел у пасяджэнні Вышэйшага Еўразійскага эканамічнага савета. Сустрэча кіраўнікоў дзяржаў пройдзе ў вузкім і пашыраным саставах. У парадак дня пасяджэння ўключана каля двух дзясяткаў пытанняў.

Лідары краін ЕАЭС абмяркуюць стратэгічныя напрамкі дзейнасці саюза, у тым ліку ход фарміравання агульных рынкаў энергарэсурсаў і далейшую гарманізацыю заканадаўства, перспектывы развіцця супрацоўніцтва з трэцімі краінамі, а таксама шэраг рабочых пытанняў.

Чакаецца, што падчас пасяджэння Аляксандр Лукашэнка агучыць мэты і прыярытэты беларускага старшынства ў органах ЕАЭС ў 2025 годзе.