Усімі сіламі і сродкамі. Ратавальнікі змагаюцца з пажарамі ў Столінскім раёне

Усю ноч ратавальнікі з паветра змагаліся з ляснымі пажарамі ў Столінскім раёне. Тры верталёты былі задзейнічаны ў тушэнні. Давялося падключыць нават цяжкую артылерыю - Мі-26 (самы грузападымальны верталёт у свеце).

Усяго для ліквідацыі пажару з зямлі, паводле аператыўных звестак, задзейнічаны 61 чалавек і 21 адзінка тэхнікі МНС і лясной гаспадаркі.

Усю ноч у навакольных лясах у Столінскім раёне работнікі МНС змагаліся з паветра з ляснымі пажарамі, якія ўсхадзіліся тут напярэдадні. Пік узгаранняў быў 21 красавіка. Сёння стыхію ратавальнікі, можна сказаць, узялі пад свой кантроль. Хоць дым па ўсёй акрузе (падрабязнасці ў відэа).