Добраўпарадкаванне і новыя турыстычныя аб'екты - Заслаўе рыхтуецца да "Дажынак"

Самабытнае Заслаўе рыхтуецца да галоўнага свята хлебаробаў, гэты горад восенню стане сталіцай абласных "Дажынак".

Ініцыятывы па добраўпарадкаванні і азеляненні падтрымліваюць мясцовыя жыхары і валанцёры. Размова ідзе не толькі аб сучаснай інфраструктуры - рамонце жылых дамоў і дарог. Магчыма, тут з'явіцца яшчэ адзін турыстычны аб'ект на гістарычным падмурку XVI стагоддзя.

2025 год для Заслаўя сапраўды знакавы. Акрамя абласных "Дажынак", тут адзначаць яшчэ адну важную дату - гораду споўніцца 1040 гадоў. Зараз ідзе актыўная падрыхтоўка - будаўніцтва, добраўпарадкаванне, а яшчэ археалагічныя даследванні. З павагай да гістарычнай спадчыны горада.

Сёлета плануюць аднавіць традыцыю рыцарскіх турніраў "Заслаўскі набат". Зараз рыхтуюць пляцоўкі для правядзення баталій і для комфорту гледачоў. Акрамя гэтага з'явiцца ўнікальная музейная прастора пад адкрытым небам, дзе можна паглыбiць веды аб гісторыі горада.