Мяцеліца, на дарогах заносы і паніжэнне бачнасці - аранжавы ўзровень небяспекі аб’яўлены ў Беларусі

Аранжавы ўзровень небяспекі аб'яўлены на нядзелю, 6 красавіка, у Беларусі. Згодна з прагнозам Белгідрамета, на большай частцы тэрыторыі краіны чакаецца ўзмацненне паўночнага ветру парывамі да 15-20 метраў за секунду і мяцеліца. Мінсктранс папярэдзіў аб магчымых адхіленнях ад раскладу руху грамадскага транспарту. Ёсць небяспека заносу на дарогах, паніжэнне бачнасці.

Камунальныя службы ўсю ноч убіралі снег і апрацоўвалі тэрыторыі супрацьгалалёднымі матэрыяламі. Складанае становішча прывяло да парушэнняў электразабеспячэння ў Мінскай вобласці. Ідуць работы па аднаўленні электрычнасці ў 130 населеных пунктах.

Футбольны матч "Дынама" - "Нёман" быў адменены з-за непагадзі

Дарэчы, непагадзь змяніла планы балельшчыкаў у Мінску. У матчы 3-га тура Betera-Вышэйшай лігі 5 красавіка мінскае "Дынама" сустракалася з "Нёманам". Але на 15-й хвіліне пры ліку 0:0 матч быў перарваны. Паядынак на стадыёне "Дынама" перанеслі, паколькі газон замяло снегам. Арбітр паведаміў, што гульня пройдзе ў іншы дзень.