Снежны адпачынак у горадзе - якія лакацыі прапануюць мінчанам

Папулярныя лакацыі для аматараў зімовых відаў спорту. Адкрыла новы сезон мінская лыжаролерная траса ў Вяснянцы. Ёсць тут і пункт пракату інвентару. Снежныя пушкі працуюць таксама на крутых схілах у мікрараёне Курасоўшчына. Гарналыжны цэнтр адкрыты для аматараў катання на сноўбордах і лыжах.

Снежны сезон на прасторах Мінска. Лыжаролерная траса ў Вяснянцы ўжо гатова прымаць аматараў зімовага актыўнага адпачынку. Першы кіламетр трасы падрыхтаваны. Лыжнікі могуць правесці свой тэст-драйв.

Галоўная лыжная траса Мінска карыстаецца папулярнасцю. Тут праводзяць трэніроўкі, гарадскія спаборніцтвы, ахвотна бавяць час і жыхары горада.

На месцы працуе і пракат. Спартыўны інвентар разлічаны на аматараў зімовых актыўнасцей рознага ўзросту. У наяўнасці ўсё для бяспечнага і камфортнага катання - лыжы, палкі і шлемы.

Аматараў зімовых віражоў можна сустрэць у гарналыжным цэнтры ў мікрараёне Курасоўшчына. Тут пакуль заснежаны вучэбны схіл працягласцю 200 метраў. На чарзе падрыхтоўка асноўнай горнай трасы для катання на сноўбордзе і лыжах.

Для пачаткоўцаў - паслугі інструктара. Вопытныя лыжнікі падзеляцца лайфхакамі, як утаймаваць снежны схіл і атрымаць асалоду ад катання.

З надыходам трывалага мінуса ў Мінску плануюць уладкаваць 14 лыжных трас. Снежныя пушкі і спецыяльная тэхніка працуюць на поўную сілу, каб падрыхтаваць як мага больш зімовых лакацый. Абсталююць і 28 сезонных лядовых каткоў у розных раёнах горада. А пакуль незалежна ад надвор'я ўсіх аматараў катання на каньках прымае каток на праспекце Пераможцаў.

У Мінску ля Палаца спорту - ледніковы перыяд. Тут размешчана галоўная ледзяная лакацыя мегаполіса. Каб актыўна правесці вольны час, неабходныя толькі канькі і добры настрой. Мабільны каток прымае ўсіх ахвотнікаў з 10:00 да 24:00.

Для зручнага і камфортнага правядзення часу створаны зоны адпачынку, дзе можна сагрэцца гарачай кавай або гарбатай.